६ महिनामा ५.२७% ले घट्यो सेयरबजार, निर्जीवन बीमा समूह सर्वाधिक

काठमाण्डौ । चालु आवको ६ महिनामा सेयरबजार ५.२७ प्रतिशतले घटेको छ । नेपाल राष्ट्र बैंकका अनुसार चालु आवको ६ महिनासम्ममा नेप्से परिसूचक २६४१.४४ विन्दुमा कायम भएको छ ।

यो परिसूचक चालु आवको पहिलो महिनाको तुलनामा ५.२७ प्रतिशत कम हो । गत साउन महिनामा नेप्से परिसूचक २७८८.३७ विन्दुमा रहेको थियो । यसर्थमा सेयरबजार ६ महिनामा ५ प्रतिशतभन्दा बढीले घट्न पुगेको छ ।

साउन महिनामा नेप्से परिसूचक २७ सयको विन्दुमाथि नै रहेपनि भदौमा भएको जेनजी आन्दोलनका कारण सेयरबजारमा पहिरो नै गएको थियो । जेनजी आन्दोलनको असरले सेयरबजारमा लगभग ३६ अंकको गिरावट आएको थियो ।

आन्दोलनका कारण बजार केही दिन बन्द भएको थियो । जेनजी आन्दोलनपछि असोज २ गते खुलेको सेयरबजारमा नकारात्मक सर्किट लागेर मार्केट क्र्यास नै भएको थियो । सोही दिन बजार १०७.०४ अंकले घटेर नकारात्मक सर्किट लाग्दा नेप्से परिसूचक २५६५.२१ विन्दुमा झरेको थियो ।

त्यसपछि यता सेयरबजारले खासै लय लिन सकेन । जेनजी आन्दोलनले विभिन्न क्षेत्रमा असर पार्दा उद्योगी, व्यापारी र लगानीकर्ताको मनोबल खस्किन पुगेको थियो, जसकारण पुँजीबजार माथि उक्लिन सकेन ।

६ महिनामा अधिकांश सेक्टर घटेका छन् । उत्पादन तथा प्रशोधन समूह, होटल समूह र म्युचुअल फण्ड समूह बाहेक सबै समूह घटेको छ । उत्पादन तथा प्रशोधन समूह १५.५० प्रतिशतले बढेको छ भने होटल समूह १.२६ प्रतिशतले बढेको छ । त्यस्तै, म्युचुअल फण्ड समूह पनि १.२० प्रतिशतले बढेको छ ।

साउन महिनामा ७६३७ विन्दुमा रहेको उत्पादन तथा प्रशोधन समूह पुष महिनासम्म आइपुग्दा बढेर ८८२१ विन्दुमा पुगेको छ । यो समूहमा ११ वटा कम्पनी सूचीकृत छन् । यो समूहमा केही नयाँ कम्पनीहरु सागर डिष्टिलरी, श्रीनगर एग्रिटेक इन्डस्ट्रिज लिमिटेड र एसवाई प्यानल पछि मात्रै सूचीकृत भएकाले पनि यो समूह बढेको देखिएको हो ।

त्यस्तै, होटल समूह पनि ६९५६.५८ विन्दुबाट ६ महिनामा बढेर ७०४४.३८ विन्दुमा पुगेको छ । यो समूहमा पनि ७ वटा कम्पनी सूचीकृत छन् । यो समूहअन्तर्गत बन्दीपुर केबलकार केही समयअघि मात्रै सूचीकृत भएकाले यो सेक्टर बढेको देखिएको हो ।

सबैभन्दा घट्ने समूहमा निर्जीवन बीमा समूह रहेको छ । जेनजी आन्दोलनपश्चात् सबैभन्दा निर्जीवन बीमा समूहमा ठूलो धक्का पुगेको छ । आन्दोलनका कारण ठूलो क्षति पुगेपछि निर्जीवन बीमा कम्पनीहरुमा अर्बौ रकमको दाबी परेपछि यो समूह ह्वात्तै घट्न पुगेको हो ।

साउन महिनामा १२४२५.७५ विन्दुमा रहेको यो समूह पुष मसान्तसम्म आइपुग्दा ११.८८ प्रतिशतले घटेर १०९४९.०३ विन्दुमा कायम हुन पुगेको छ ।

त्यस्तै अन्य समूह ११.४० प्रतिशत, लगानी समूह ९.११ प्रतिशत, व्यापार समूह ८.७५ प्रतिशत, लघुवित्त समूह ६.६४ प्रतिशत, हाइड्रोपावर समूह ६.११ प्रतिशत, वाणिज्य बैंक समूह ५.३२ प्रतिशत, फाइनान्स समूह ३.१४ प्रतिशत र जीवन बीमा समूह १.५७ प्रतिशतले घटेको छ ।