घट्दो बजारमा कारोबार रकम पनि खुम्चिदै, चुनावअघि नै लय लिनेमा विश्लेषक ढुक्क

काठमाण्डौ । साताको चौथो कारोबार दिन सेयरबजारमा झिनो अंकको गिरावट आएको छ । नेपाल स्टक एक्सचेञ्च (नेप्से) परिसूचक ०.०६ प्रतिशत अर्थात १.६४ अंकले घटेर २ हजार ६८१.५० विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.१५ प्रतिशतले घटेर ४५६ विन्दुमा झरेको छ । यो दिन नेप्सेमा सूचीकृत मध्ये ३२६ वटा स्क्रिप्टको १ करोड ६६ लाख ८२ हजार ६२६ कित्ता सेयर ७ अर्ब ४९ करोड ९७ लाख बढीको सेयर कारोबार भयो । अघिल्लो दिन भने ८ अर्ब ६३ करोड रुपैयाँ बढीको सेयर कारोबार भएको थियो ।

आजको बजारबारे बजार जानकार निमानन्द कंडेल भन्छन्, ‘बजार घट्नुपर्ने त्यस्तो ठूलो इस्यु त केही छैन तर पछिल्लो समय राजनीतिक विषयका कारण लगानीकर्ताहरु अझै अन्यौलमै छन् । केही पक्षले चुनाव हुने र केही पक्षले चुनाव नहुने हल्ला फिजाउँदा लगानीकर्ताहरुमा अझै अन्यौलता रहेकाले बजारले पिक अप लिन सकिरहेको छैन । तर बजार चुनावअघि नै विस्तारै–विस्तारै बढेर लय लिन्छ भन्ने आशा छ ।’

त्यस्तै, अर्का बजार जानकार यज्ञ घिमिरे भन्छन्, ‘बजार बढ्नका लागि माहोल पोजेटिभ नै छ । केही साता अघि लगातार बढेको बजारमा लगानीकर्ताहरुले थोरै भएपनि नाफा बुक गरेका हुन् । केहीले नाफा बुक नै नगरेपनि पोर्टफोलियोमा साँवा मात्रै आएपनि सेयर बेचेका छन् । बजारमा सप्लाई बढ्न गएपछि बजारमा करेक्सन देखिनु स्वभाविक नै हो । लगानीकर्ताहरुले यसअघि ठूलो घाटा ब्यहोरेका थिए । अब थप घाटा नहोस् भन्ने हेतुले बजार बढेको समय बेचेको पनि हुन सक्छ । तर अब सेयर बेचिसकेपछि उही लगानीकर्ताहरु फेरी सेयर किन्न थाल्छन् । बजार एउटा प्वइन्टमा पुगेर फेरी बढ्ने देखिन्छ । सय अंक जतिको घटबढ हुनु स्वभाविक नै हो । बजार एउटा सपोर्ट जोनमा पुगेपछि पिक अप लिन सक्ने सम्भावना देखिन्छ ।’

यो दिन नेप्सेमा सूचीकृत १३ वटा समूहमध्ये ७ वटामा हरियाली छायो भने ६ वटामा रातो पोतियो । आज फाइनान्स समूह सर्वाधिक बढ्यो । यो समूह आज ०.९३ प्रतिशतले बढ्यो ।

यस्तै विकास बैंक समूह ०.१० प्रतिशत, होटल ०.१८, हाईड्रो ०.३८, लगानी ०.०८, निर्जीवन बीमा ०.१३ र व्यापार ०.४९ प्रतिशतले बढ्यो ।  

उत्पादन तथा प्रशोधन समूह आज सर्वाधिक अर्थात ०.५३ प्रतिशतले घट्यो । बैंकिङ समूह पनि आज ०.३२ प्रतिशत, जीवन बीमा ०.१३, लघुवित्त ०.३०,म्युचुल फण्ड ०.२८ र अन्य ०.३१ प्रतिशतले घट्यो ।

धेरै कारोबार गर्ने कम्पनीहरु

आज आँखुखोला जलविद्युतको सर्वाधिक सेयर कारोबार भयो । आज यो कम्पनीको ८० करोड बढीको सेयर कारोबार भयो ।

यस्तै, एसवाई प्यानलको ६० करोड ३० लाख, राधी विद्युतको २६ करोड २५ लाख, श्रीनगर एग्रीटेकको २५ करोड १८ लाख र बन्दीपुर केवलकारको २० करोड २५ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज कालिञ्चोक दर्शन र सुपरमाई हाईड्रो, सुपर मादी हाईड्रो र आँखुखोला जलविद्युतको सेयरमूल्यमा अपर सर्किट लाग्यो ।

यस्तै कर्पोरेट डेभलपमेन्ट बैंकको सेयरमूल्य ७ प्रतिशत, बिन्ध्यवासिनी हाईड्रोको ६.२६, मेन्छियाम हाईड्रोपावरको ४.४२ र हिमाल दोलखा हाईड्रोको सेयरमूल्य ४.४२ प्रतिशतले बढ्यो ।

राँवा इनर्जीको सेयरमूल्य पनि आज सर्वाधिक अर्थात ४.१३ प्रतिशतले घट्यो । यस्तै गुराँस लघुवित्तको ३.८४ प्रतिशत, दरमखोला हाईड्रोको ३.६८ र नारायणी डेभलपमेन्ट बैंकका सेयरमूल्य ३.१३ प्रतिशतले घट्यो ।