१०.२५ अंकले ओरालो लाग्यो सेयरबजार, जानकार भन्छन्, ‘बढ्ने आधार धेरै छन्’

काठमाण्डौ । साताको पहिलो कारोबार दिन सेयरबजार दोहोरो अंकले घटेको छ । नेपाल स्टक एक्सचेञ्च (नेप्से) परिसूचक ०.३७ प्रतिशत अर्थात १०.२५ अंकले घटेर २ हजार ६९८.४४ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.१८ प्रतिशतले घटेर ४५९.६३ विन्दुमा झरेको छ । यो दिन नेप्सेमा सूचीकृत मध्ये ३३० वटा स्क्रिप्टको २ करोड ६२ लाख ३६ हजार २०४ कित्ता सेयर ११ अर्ब ६५ करोड ९७ लाख बढीको सेयर कारोबार भयो । गत बिहिबार भने ११ अर्ब ५८ करोड रुपैयाँ बढीको सेयर कारोबार भएको थियो ।

आजको बजारबारे बजार जानकार दामोदर गजुरेल भन्छन्, ‘बजारमा आज उतारचढाव देखियो, जुन यो सामान्य नै मान्नुपर्छ । विशेषगरी केही दिनयता हाइड्रो सेक्टरका लगानीकर्ताहरुले स–सानो नाफा बुक गरी सेयर बिक्री गरेकाले पनि बजारमा करेक्सन देखिएको हो । साथै केही कम्पनीहरुको लकइन अवधि सकिएर त्यस्ता कम्पनीबाट नाफा बुक गरेर सेयर बिक्री गर्दा बजार बढ्न नसकेको हो ।’

उनले थपे, ‘अहिलेको बजारको अवस्थालाई करेक्सन फेजको रुपमा लिन सकिन्छ । अहिले विशेषगरी हाइड्रो समूहमा लगानीकर्ता बढी आकर्षित छन्, जसकार कारोबार रकम खासै घटेको छैन । लगानीकर्ताहरुमा अहिले चुनावको लागि सेयरबजारको पैसा बाहिरिने होकी भन्ने डर छ, त्यसकारण लगानीकर्तामा कन्फिडेन्ट आएको छैन । नत्र बजार बढ्नुनै पर्ने आधारहरु धेरै छन् । सेक्टर रोटेसन हुँदै बजारले एउटा राम्रो मुभ बनाउन सक्ने देखिन्छ, तर चुनावअघि एउटा ठूलो करेक्सन आउने जस्तो सम्भावना भने छ ।’

यो दिन नेप्सेमा सूचीकृत १३ वटा समूहमध्ये दुईवटा बाहेक अन्य सबै समूहमा रातो पोतियो । आज लगानी र अन्य समूह मात्रै बढे । यी समूहहरु क्रमशः०.०८ र ०.४६ प्रतिशतले बढ्यो ।

आज होटल समूह सर्वाधिक अर्थात २.१३ प्रतिशतले घट्यो । यस्तै बैंकिङ समूह ०.१४ प्रतिशत, विकास बैंक ०.९२, फाइनान्स ०.०१, हाईड्रो ०.३१, जीवन बीमा ०.७१, उत्पादन तथा प्रशोधन १.१५, लघुवित्त ०.२१, म्युचअल फण्ड ०.६१, निर्जीवन बीमा ०.३२ र व्यापार समूह १.३० प्रतिशतले घट्यो ।

धेरै कारोबार गर्ने कम्पनीहरु

आज सुपर मादी हाईड्रोपावरको सर्वाधिक सेयर कारोबार भयो । आज यो कम्पनीको ५६ करोड ३ लाख बढीको सेयर कारोबार भयो ।

यस्तै, आँखुखोला जलविद्युतको ५१ करोड ४९ लाख, रिडी पावरको ४७ करोड ७४ लाख, राधी विद्युतको ४३ करोड ९८ लाख र एसवाई प्यानल नेपालको ४२ करोड ४१ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ३ वटा कम्पनीको सेयरमूल्यमा अपर सर्किट लाग्यो । आज सुपरमाई हाईड्रो, मोदी इनर्जी, रिडि पावर र खानीखोला हाईड्रोको  सेयरमूल्यमा अपर सर्किट लाग्यो ।

यस्तै हिमालयन हाईड्रोपावरको सेयरमूल्य ५.३९ प्रतिशत, जोशी हाईड्रोको ४.४९, मायाखोला हाईड्रोको ४.२९ र हाथवे इन्भेष्टमेन्टको सेयरमूल्य ३.९२ प्रतिशतले बढ्यो ।

कालिञ्चोक दर्शनको सेयरमूल्य आज सर्वाधिक अर्थात ८.९१ प्रतिशतले घट्यो । यस्तै कर्पोरेट डेभलपमेन्ट बैंकको सेयरमूल्य ८.२९ प्रतिशत र नारायणी डेभलपमेन्ट बैंकको सेयरमूल्य ५.६४ प्रतिशतले घट्यो ।