नेप्सेमा झिनो गिरावट,‘पर्ख र हेरको अवस्थामा लगानीकर्ता’

काठमाण्डौ । साताको चौथो कारोबार दिन आज सेयरबजार झिनो अंकले घटेको छ । नेपाल स्टक एक्सचेञ्च (नेप्से) परिसूचक ०.०४ अंकले घटेर २ हजार ६६२.०९ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.१७ प्रतिशतले बढेर ४५५.२० विन्दुमा पुगेको छ । यो दिन नेप्सेमा सूचीकृत मध्ये ३२९ वटा स्क्रिप्टको २ करोड २२ लाख ८२ हजार ५० कित्ता सेयर ८ अर्ब ६९ करोड २२ लाख बढीको सेयर कारोबार भयो । अघिल्ला दिन भने ८ अर्ब १६ करोड रुपैयाँ बढीको सेयर कारोबार भएको थियो ।

आजको बजारबारे बजार जानकार कविराज तिमिल्सिना भन्छन्, ‘सेयरबजारमा एक चरणको नाफा बुक हुँदा करेक्सन देखिएको छ । अहिलेको अवस्था हेर्दा बजारमा करेक्सन फेज नै चलेको जस्तो देखिन्छ । लगानीकर्ताहरु चुनावी माहोल कस्तो बन्दै जान्छ भनि पर्ख र हेरको अवस्थामा बसेका छन् । केही लगानीकर्तारुमा अझैपनि लगानी गर्ने वा नगर्ने भन्ने विषयमा अन्योलता कायम रहेकाले मार्केटले गति लिन सकिरहेको छैन ।’

उनले थपे, ‘अहिले सूचीकृृत कमपनीहरुको रिर्पोटहरु पनि राम्रै आइरहेको छ । योसँगै देशको आर्थिक अवस्थाका सूचकहरु पनि राम्रा देखिएका छन् । यद्यपी अब बजारमा सेक्टर रोटेसन हुँदै विस्तारै–विस्तारै बजारले लय समाउँदै जानेछ ।’

यो दिन नेप्सेमा सूचीकृत १३ वटा समूहमध्ये ५ वटा समूहमा हरियाली छायो भने अन्य ८ वटा समूहमा रातो पोतियो । आज हाईड्रो समूह सर्वाधिक अर्थात ०.४७ प्रतिशतले बढ्यो । यस्तै बैंकिङ समूह ०.१०, विकास बैंक ०.१८, लगानी ०.०७ र निर्जीवन बीमा समूह ०.०८ प्रतिशतले बढे ।

होटल समूह सर्वाधिक अर्थात ०.६३ प्रतिशतले घटेको आज फाइनान्स समूह ०.२५, जीवन बीमा ०.२३, उत्पादन तथा प्रशोधन ०.४६, लघुवित्त ०.०६, म्युचुअल फण्ड ०.३६, अन्य ०.२४ र व्यापार समूह ०.२३ प्रतिशतले घट्यो ।

धेरै कारोबार गर्ने कम्पनीहरु

आज रिडी पावरको सर्वाधिक सेयर कारोबार भयो । आज यो कम्पनीको ६५ करोड ४७ लाख बढीको सेयर कारोबार भयो ।

यस्तै, आँखुखोला जलविद्युतको ६२ करोड १३ लाख, सिंगटी हाईड्रोको ५८ करोड ७६ लाख, एसवाई प्यानल नेपालको २७ करोड ४९ लाख र युनियन हाईड्रोपावरको २६ करोड ७ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज रिडि पावरको सेयरमूल्यमा मात्रै अपर सर्किट लाग्यो। यस्तै आज सिंगटी हाईड्रोको सेयरमूल्य ८.६८ प्रतिशत, आँखुखोला जलविद्युतको ७.२१, घलेम्दी हाईड्रोको ५.६९ र पिपुल्स हाईड्रोको सेयरमूल्य ४.७३ प्रतिशतले बढ्यो ।

सुपरमाई हाईड्रोको सेयरमूल्य आज सर्वाधिक अर्थात ६.३९ प्रतिशतले घट्यो । यस्तै शुभम् पावरको सेयरमूल्य ६.२१ प्रतिशत र क्रेष्ट माईक्रो लाइफको सेयरमूल्य ५.८० प्रतिशतले घट्यो ।