सेबोनका कर्मचारीहरु फेरी आन्दोलनमा उत्रिदै, आजदेखि धर्ना र पेन डाउन सुरु

काठमाण्डौ । नेपाल धितोपत्र बोर्ड (सेबोन)का कर्मचारीहरु फेरी आन्दोलनमा उत्रिएका छन् । बोर्डका कर्मचारी युनियनले आफ्ना मागहरू पूरा नभएको भन्दै फेरि आन्दोलनलाई निरन्तरता दिने निर्णय गरेको हो ।

युनियनले एक विज्ञप्ति जारी गर्दै बोर्ड व्यवस्थापनले मागहरूप्रति बेवास्ता गरेको भन्दै पुनः आन्दोलन जारी राख्ने निर्णय गरेको छ ।

युनियनले पछिल्लो समय प्रतिनिधि सभाको चुनावका कारण आचारसंहिताका कारण हरेक दिन १ घण्टा धर्ना तथा पेन डाउन कार्यक्रम स्थगन भई आएकोमा यहि फागुन २८ गते देखि पुनः सशक्तरुपमा हरेक दिन बिहान १० बजे देखि ११ बजे सम्म १ घण्टा धर्ना तथा पेन डाउन कार्यक्रम निरन्तर गर्ने विज्ञप्तिमार्फत जानकारी गराएको छ ।  

युनियनले आजदेखि हरेक दिन बिहान १० बजेदेखि ११ बजेसम्म धर्ना र पेन डाउन कार्यक्रमलाई निरन्तरता दिने जनाएको छ । पेन डाउन कार्यक्रममा कर्मचारीहरू कार्यालयमा उपस्थित भए पनि कामकाज ठप्प पार्ने युनियनले चेतावनी दिएको छ ।  

कर्मचारी युनियनले बोर्ड व्यवस्थापनलाई तत्काल वार्तामा बसेर समस्याको समाधान गर्न आग्रह गरेको छ । माग पूरा नभएसम्म आन्दोलन जारी रहने उनीहरूले चेतावनी दिएका छन् ।