ओलीसँगै रमेश लेखकको घरमा पनि प्रहरी, दुवैलाई पक्राउ गर्ने तयारी

काठमाण्डौ । पूर्वप्रधानमन्त्री केपी शर्मा ओलीसँगै पूर्वगृहमन्त्री रमेश लेखकलाई समेत नियन्त्रणमा लिने तयारी तीव्र बनेको छ। प्रहरी स्रोतका अनुसार दुवै नेतालाई पक्राउ गर्ने प्रक्रिया अन्तिम चरणमा पुगेको छ।

यसैक्रममा भक्तपुरको गुण्डुस्थित ओली निवाससँगै कटुन्जेस्थित रमेश लेखकको घरमा पनि प्रहरी टोली पुगेको छ। दुवै स्थानमा सुरक्षा सतर्कता बढाइएको छ भने आवश्यक कागजी प्रक्रिया पूरा गरेर नियन्त्रणमा लिने तयारी भइरहेको बताइएको छ।

यसअघि गएराति नक्सालस्थित प्रहरी महानिरीक्षकको निवासमा गृहमन्त्री सुधन गुरुङ, नेपाल प्रहरी प्रमुख दानबहादुर कार्की र सशस्त्र प्रहरी प्रमुख राजु अर्यालबीच उच्चस्तरीय छलफल भएको थियो। उक्त बैठकमा दुवै नेतामाथि कारबाही प्रक्रिया अघि बढाउने विषयमा सहमति जुटाइएको स्रोतको दाबी छ।

नयाँ सरकार गठनलगत्तै बसेको मन्त्रिपरिषद् बैठकले जेनजी आन्दोलन दमनसम्बन्धी गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्ने निर्णय गरेपछि सुरक्षा संयन्त्र सक्रिय बनेको हो। निर्णयपछि गृहमन्त्री गुरुङले रातभर सुरक्षा निकायका उच्च अधिकारीहरूसँग निरन्तर परामर्श गर्दै सम्भावित कारबाहीको खाका तयार पारेका थिए।

दुवै नेतामाथि कारबाही प्रक्रिया अघि बढ्न लागेसँगै देशको राजनीतिक वातावरण थप तातिने संकेत देखिएको छ।