पक्राउ गरिएको ओली र लेखकलाई कहाँ राखिएको छ ?

काठमाण्डौ । पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई पक्राउपछि काठमाडौँको भद्रकालीस्थित जिल्ला प्रहरी परिसरमा राखिएको छ। शनिबार बिहान भक्तपुरका विभिन्न स्थानबाट नियन्त्रणमा लिइएका दुवै जनालाई सोही परिसरमा ल्याएर राखिएको हो।

जिल्ला प्रहरी परिसर काठमाडौँका एक अधिकृतका अनुसार ओलीलाई भक्तपुरको गुण्डुबाट र लेखकलाई कटुन्जेबाट पक्राउ गरिएको थियो। पक्राउ लगत्तै उनीहरूलाई सिधै भद्रकालीस्थित परिसरमा ल्याइएको हो।

यसअघि भदौ २३ र २४ मा भएको जेनजी प्रदर्शनबारे अनुसन्धान गर्न गठित गौरीबहादुर कार्की नेतृत्वको आयोगले ओली र लेखकसहित केन्द्रीय सुरक्षा समितिका पदाधिकारीमाथि फौजदारी मुद्दा चलाउन सिफारिस गरेको थियो।

उक्त सिफारिसलाई कार्यान्वयन गर्ने निर्णय शुक्रबार बालेन शाह नेतृत्वको पहिलो मन्त्रिपरिषद् बैठकले गरेपछि पक्राउ प्रक्रिया अघि बढाइएको हो। त्यसपछि गृहमन्त्री सुधन गुरुङले आईजीपी दानबहादुर कार्की र सशस्त्र प्रहरीका आईजी राजु अर्यालसँग छलफल गरी पक्राउको तयारी गरेका थिए।

सोही तयारीअनुसार शनिबार बिहान दुवै जनालाई पक्राउ गरी हाल जिल्ला प्रहरी परिसर काठमाडौँमै राखिएको प्रहरीले जनाएको छ।