अन्तिम समयमा रोकियो सामसुङमा हुन लागेको ठूलो हड्ताल

काठमाण्डौ । दक्षिण कोरियाली प्रविधि कम्पनी सामसुङमा हुन लागेको ठूलो हड्ताल अन्तिम समयमा रोकिएको छ। कम्पनी र श्रमिक संघबीच तलब तथा बोनस सम्बन्धी प्रारम्भिक सहमति भएपछि हड्ताल स्थगित गरिएको हो। नेशनल सामसुङ इलेक्ट्रोनिक युनियनले मे २२ देखि २७ सम्म सदस्यहरूबाट सहमतिबारे मतदान गरिने जनाएको छ।

यो निर्णयले विश्वव्यापी प्रविधि उद्योगमा सम्भावित आपूर्ति संकटको चिन्ता केही समयका लागि कम गरेको छ। सामसुङ विश्वकै सबैभन्दा ठूलो मेमोरी चिप निर्माता कम्पनी हो, जसका चिपहरू एआई डेटा सेन्टर, स्मार्टफोन र ल्यापटपमा व्यापक रूपमा प्रयोग हुन्छन्।

विवाद उत्पन्न हुनुको कारण ?

विवाद मुख्य रूपमा एआई मेमोरी चिपबाट आएको नाफा कसरी बाँड्ने भन्ने विषयमा केन्द्रित थियो। सामसुङले मेमोरी चिप बनाउने करिब २७ हजार कर्मचारीलाई अत्यधिक बोनस दिने योजना बनाएको थियो, जुन अन्य विभागका कर्मचारीभन्दा धेरै गुणा बढी थियो।

संघले भने कम उन्नत चिप उत्पादन गर्ने कर्मचारीहरूलाई पनि समान अवसर दिनुपर्ने माग गरेको थियो। यी चिपहरू टेस्ला र एनभिडिया जस्ता कम्पनीका लागि उत्पादन गरिन्छन्।

सामसुङको जनवरीदेखि मार्चसम्मको सञ्चालन नाफा गत वर्षको तुलनामा करिब ७५० प्रतिशतले बढेको थियो। एआई चिपको माग तीव्र रूपमा बढेकाले कम्पनीको बजार मूल्य पनि १ ट्रिलियन डलरभन्दा माथि पुगेको छ।

कम्पनीले सम्झौतापछि जारी गरेको वक्तव्यमा भविष्यमा यस्ता समस्या दोहोरिन नदिने गरी परिपक्व र रचनात्मक श्रम सम्बन्ध विकास गर्ने बताएको छ।

विश्लेषकहरूका अनुसार हड्ताल भए सामसुङलाई अर्बौं डलर घाटा हुन सक्थ्यो। साथै, विश्वव्यापी चिप आपूर्ति श्रृंखला प्रभावित हुने सम्भावना थियो ।