सुतिरहेका बेला स्कूलमा भीषण आगलागी, १६ विद्यार्थीको मृत्यु, ७४ विद्यार्थी घाइते

काठमाण्डौं । पूर्वी अफ्रिकी मुलुक केन्यामा भएको भीषण आगलागीमा परी कम्तीमा १६ विद्यार्थीको ज्यान गएको छ भने दर्जनौँ विद्यार्थी घाइते भएका छन् ।  

राजधानी नैरोबीबाट करिब १२० किलोमिटर पश्चिममा रहेको गिलगिल क्षेत्रको एक बोर्डिङ स्कुलमा आगलागी हुँदा घटना भएको हो ।

प्रहरीका अनुसार उतुमिसी गर्ल्स स्कुलको छात्रावासमा बिहीबार बिहान विद्यार्थीहरू सुतिरहेको समयमा अचानक आगलागी भएको थियो ।  

आगो तीव्र रूपमा फैलिँदा धेरै विद्यार्थी बाहिर निस्कन नपाई च्यापिएको बताइएको छ ।

घटनास्थलमा पुगेका एक प्रहरी अधिकारीका अनुसार आगलागीमा परी १६ जना विद्यार्थीको मृत्यु भएको पुष्टि भएको छ भने कम्तीमा ७४ जना घाइते भएका छन् ।  

घाइतेमध्ये केहीको अवस्था गम्भीर रहेको र विभिन्न अस्पतालमा उपचार भइरहेको जनाइएको छ ।

केन्या रेडक्रस र स्थानीय सुरक्षा निकायले घटनास्थलमा उद्धार तथा राहत कार्य जारी रहेको बताएका छन् ।  

आगलागीको वास्तविक कारण भने अझै खुल्न सकेको छैन । प्रारम्भिक अनुसन्धान सुरु गरिएको प्रहरीले जनाएको छ ।

घटनापछि विद्यालय परिसर बाहिर ठूलो संख्यामा अभिभावक र स्थानीय बासिन्दा भेला भएका थिए । 

केन्याली प्रहरी कमाण्डर मसुद म्विनीले घटनालाई “अत्यन्त दुःखद र पीडादायी” भन्दै पीडित परिवारप्रति समवेदना व्यक्त गरेका छन् ।

केन्याका बोर्डिङ स्कुलहरूमा पछिल्ला वर्षहरूमा आगलागीका घटना बारम्बार दोहोरिँदै आएका छन् ।  

विशेषगरी छात्रावासमा अत्यधिक विद्यार्थी संख्या, कमजोर सुरक्षा मापदण्ड, आपतकालीन निकासको अभाव तथा विद्युत व्यवस्थापनमा लापरवाहीलाई यस्ता दुर्घटनाको मुख्य कारण मानिने गरिएको छ ।

मानव अधिकार तथा बाल सुरक्षा क्षेत्रमा काम गर्ने संस्थाहरूले विद्यालय सुरक्षालाई लिएर सरकारमाथि पटक–पटक प्रश्न उठाउँदै आएका छन् ।  

तर, पर्याप्त सुधार हुन नसक्दा यस्ता घटनामा विद्यार्थीले ज्यान गुमाउने क्रम रोकिएको छैन ।

पछिल्लो घटनाले फेरि एकपटक केन्याको बोर्डिङ स्कुल सुरक्षा व्यवस्थामाथि गम्भीर प्रश्न खडा गरेको छ ।  

एजेन्सी