म्यानमारमा भीषण विस्फोटः ५५ जनाको मृत्यु, दर्जनौँ घाइते

काठमाण्डौ । म्यानमारको विद्रोही नियन्त्रणमा रहेको सान स्टेटको नामखाम टाउनशिपमा आइतबार भएको शक्तिशाली विस्फोटमा कम्तीमा ५५ जनाको मृत्यु भएको छ भने दर्जनौँ व्यक्ति घाइते भएका छन्। स्थानीय स्रोतहरूका अनुसार मृतकमध्ये २५ महिला र ३० पुरुष रहेका छन्, यद्यपि विभिन्न सञ्चारमाध्यमहरूले फरक–फरक तथ्यांक सार्वजनिक गरेका छन्।

उक्त क्षेत्रको नियन्त्रणमा रहेको टाङ नेशनल लिबरेशन आर्मी (टीएनएलए) ले खानी तथा ढुंगा उत्खननमा प्रयोग हुने विस्फोटक पदार्थ अनायास विस्फोट हुँदा दुर्घटना भएको जनाएको छ। टीएनएलएका अनुसार आइतबार दिउँसो करिब १२ बजे भएको विस्फोटका कारण स्थानीय बासिन्दाको ज्यान गएको, धेरै घाइते भएको तथा घरहरूमा व्यापक क्षति पुगेको छ।

प्रत्यक्षदर्शीहरूले सुरुवातमा यसलाई हवाई आक्रमण ठानेको बताएका छन्। सामाजिक सञ्जालमा एक स्थानीय बासिन्दाले आफू मोबाइल हेर्दै कोठाभित्र बसेको कारण जोगिएको उल्लेख गर्दै, घटनापछि मानिसहरू आफ्ना परिवारजनलाई खोज्दै रुँदै चिच्याइरहेको हृदयविदारक अवस्था देखिएको बताएका छन्।

उद्धारकर्मीहरूका अनुसार विस्फोटपछि ७० भन्दा बढी घाइतेलाई अस्पताल पुर्याइएको छ भने सयभन्दा बढी घरमा क्षति पुगेको छ। केही रिपोर्टहरूमा बालबालिकासमेत मृतकमध्ये परेको उल्लेख गरिएको छ।