आईपीएलमा चम्किएका वैभव सूर्यवंशीलाई साइन गर्न ब्राण्डहरुबीच होड, कति दिन तयार छन् कम्पनीहरु ?

काठमाण्डौ । भारतीय क्रिकेटका १५ वर्षका युवा ब्याट्सम्यान वैभव सूर्यवंशीको चर्चा अहिले तीव्र रूपमा बढिरहेको छ। हालै सम्पन्न आईपीएल सिजनमा उनले उत्कृष्ट प्रदर्शन गर्दै १६ खेलमा ७७६ रन बनाए र उनको स्ट्राइक रेट २३७.३० रह्यो। उनी सर्वाधिक रन हान्दै ओरेन्ज क्याप विजेता र मोस्ट भ्यालुएबल प्लेयर पनि बने। यद्यपि उनको टिम राजस्थान रोयल्स फाइनलमा पुग्न सकेन, तर उनको व्यक्तिगत प्रदर्शनले सबैको ध्यान आकर्षित गर्यो ।

उनको बढ्दो लोकप्रियताका कारण कम्तीमा छ वटा ठूला ब्रान्डहरू उनलाई एन्डोर्समेन्टका लागि साइन गर्न होडमा छन्। यीमध्ये स्पोर्ट्स ड्रिंक, ब्याट, न्यूट्रिशन र हाई–परफर्मेन्स फुटवेयर बनाउने कम्पनीहरू समावेश छन्। अहिले उनको कमर्शियल भ्यालु १ करोड भारुभन्दा बढी पुगेको अनुमान गरिएको छ।

उनी पहिले नै केही ब्रान्डहरूसँग जोडिएका छन्, जसमध्ये जाइडस वेलनेसको हेल्थ ड्रिंक कम्प्लान र गुगल पेका विज्ञापनहरू समावेश छन्।

रिपोर्टअनुसार उनको एन्डोर्समेन्ट शुल्क अहिले करिब ५० लाख भारु प्रति डिल छ, जुन १ करोड भारुभन्दा पनि बढी हुन सक्छ, तर यो उनको प्रदर्शन र परिवार तथा व्यवस्थापनको रणनीतिमा निर्भर गर्छ किनभने उनी अहिले मात्र १५ वर्षका छन्।

यस सिजनमा केही ठूला खेलाडीहरू जस्तै हार्दिक पाण्ड्या र ऋषभ पन्तको प्रदर्शन अपेक्षाअनुसार हुन नसकेका कारण नयाँ र युवा स्टारहरूको ब्रान्ड भ्यालु तीव्र रूपमा बढिरहेको जनाइएको छ । 

साथै, धेरै स्पोर्ट्स ट्यालेन्ट म्यानेजमेन्ट कम्पनीहरूले उनलाई प्रतिनिधित्व गर्न चाहेका छन्, तर अहिले उनका व्यावसायिक सम्झौताहरू टिम र परिवारको नियन्त्रणमा राखिएको बताइएको छ।