अमेरिकी मध्यावधि निर्वाचनको प्रभाव : सेयर बजारमा गिरावट, सरकारी ऋणपत्रमा आकर्षण बढ्यो

काठमाडौं। अमेरिकी मध्यावधि निर्वाचनको परिणामले सेयर बजारमा गिरावट आएपछि लगानीकर्ताहरू सुरक्षित लगानीको विकल्पका रूपमा सरकारी ऋणपत्रतर्फ आकर्षित भएका छन् । यससँगै अमेरिकी ट्रेजरी ऋणपत्रको प्रतिफल  घटेको छ ।

बेन्चमार्क मानिने १० वर्षे ट्रेजरी नोटको प्रतिफल करिब ५ आधार बिन्दुले घटेर ४.९०२ प्रतिशतमा झरेको छ । त्यस्तै, ३० वर्षे ऋणपत्रको प्रतिफल ५.२९ प्रतिशतले घटेको छ भने छोटो अवधिको दुई वर्षे नोटको प्रतिफल ६ आधार बिन्दुले घटेर ४.५५ प्रतिशत कायम भएको छ ।

एक आधार बिन्दु भनेको ०.०१ प्रतिशत अर्थात् एक प्रतिशतको सय भागमध्ये एक भाग हो । ऋणपत्रको मूल्य र प्रतिफलबीच विपरीत सम्बन्ध हुने भएकाले मूल्य बढ्दा प्रतिफल घट्छ र मूल्य घट्दा प्रतिफल बढ्छ ।

निर्वाचन परिणाम सार्वजनिक हुँदै जाँदा अमेरिकी सेयर बजारका फ्युचर्समा तीव्र गिरावट आएको छ । एसएण्डपी ५०० सँग सम्बन्धित फ्युचर्स १.१ प्रतिशत र न्यास्ड्याक–१०० फ्युचर्स २ प्रतिशतले घटेका छन् ।

बुल बजारको प्रमुख आधार बनेका कृत्रिम बुद्धिमत्ता (एआई) सम्बन्धी कम्पनीका सेयरमा सबैभन्दा बढी गिरावट देखिएको छ । डेमोक्र्याटिक पार्टीको सम्भावित जितले डेटा सेन्टर निर्माण विस्तारको गतिमा अवरोध पुर्‍याउन सक्ने आशंकाले ती कम्पनीका सेयरमा दबाब परेको हो ।