ऊर्जामन्त्री श्रेष्ठको मन्त्रालयमा आकस्मिक अनुगमन, कर्मचारीका गुनासा सुने

काठमाण्डौ । ऊर्जा, जलस्रोत तथा सिँचाइ मन्त्री विराज भक्त श्रेष्ठले बिहीबार मन्त्रालयका विभिन्न महाशाखा तथा शाखाको आकस्मिक अनुगमन गरेका छन्।

मन्त्रालयको सेवा प्रवाह, कार्यसम्पादन र प्रशासनिक गतिविधिलाई थप प्रभावकारी तथा व्यवस्थित बनाउने उद्देश्यले मन्त्री श्रेष्ठ विभिन्न महाशाखा र शाखामा पुगेर कामकारबाही तथा कार्यप्रगतिको अवस्थाबारे जानकारी लिएका हुन्।

अनुगमनका क्रममा उनले कर्मचारीसँग प्रत्यक्ष छलफल गर्दै कार्यसम्पादनका क्रममा देखिएका समस्या, चुनौती तथा गुनासा सुने। साथै मन्त्रालयका कामलाई थप प्रभावकारी र परिणाममुखी बनाउन आवश्यक निर्देशनसमेत दिए।

मन्त्री श्रेष्ठले मन्त्रालयमा रहेका महत्वपूर्ण कागजात तथा दस्तावेज व्यवस्थित राख्न, अभिलेख व्यवस्थापन चुस्त बनाउन तथा कार्यालयको भौतिक संरचनाको मर्मतसम्भार र सौन्दर्यकरणमा ध्यान दिन कर्मचारीलाई निर्देशन दिएका छन्।

उनले सेवाग्राहीबाट प्राप्त जनगुनासो, त्यसको सम्बोधनको अवस्था तथा आगामी दिनमा मन्त्रालयले अघि बढाउनुपर्ने कार्ययोजनाबारे समेत सम्बन्धित अधिकारीसँग ब्रिफिङ लिएका थिए।

मन्त्रालयको कामकारबाहीलाई व्यवस्थित, सेवाग्राहीमैत्री र परिणाममुखी बनाउँदै प्रशासनिक कार्यसम्पादनमा देखिएका कमजोरी सुधार गर्न अनुगमनलाई प्राथमिकता दिइएको मन्त्रालयले जनाएको छ।