विश्वकप फुटबलका कारण बढ्यो अमेरिकामा रोजगारी, बढ्दो खर्चका कारण भने व्यवसायी चिन्तित

काठमाण्डौ । विश्वकप फुटबलका कारण अमेरिकी अर्थतन्त्रमा सकारात्मक प्रभाव देखिएको छ । विश्वकप पूर्वसन्ध्यामा अमेरिकामा मे महिनामा १ लाख ७२ हजार नयाँ रोजगारी थपिएको छ ।

यो संख्या अर्थशास्त्रीहरुले अपेक्षा गरेभन्दा बढी हो । अर्थशास्त्रीहरुले मे महिनामा अमेरिकामा १ लाख ५ हजार नयाँ रोजगारी सिर्जना हुने आँकलन गरेका थिए ।

विश्वकप शुरु हुनअघि पब,बार र रेष्टुरेन्टमा गतिविधि बढेसँगै रोजगारी वृद्धि भएको हो । अमेरिकी श्रम तथ्यांक विभागका अनुसार मनोरञ्जन, आतिथ्य सत्कार, स्थानीय सरकार र स्वास्थ्य सेवामा जनशक्ति थपिएका छन् ।

यद्यपी वित्तीय क्षेत्रमा रोजगारी घटेको छ । मे महिनामा समग्र अमेरिकी अर्थतन्त्रको बेरोजगारी दर ४.३ प्रतिशत कायम छ । आगामी साता अमेरिका, मेक्सिको र क्यानडामा शुरु हुन लागेको विश्वकप फुटबललाई मध्यनजर गर्दै विभिन्न रेष्टुरेन्ट,बार तथा पबहरुले अतिरिक्त जनशक्ति हायर गरिरहेको बताएका छन् । यद्यपी अमेरिका र इरानबीचको युद्धका कारण खर्च बढिरहेको व्यवसायीहरुले गुनोसो गरेका छन् ।

अमेरिका इरान युद्धका कारण स्ट्रेट अफ हर्मुज बन्द अवस्थामा रहेको छ । जसका कारण इन्धनको मूल्य आकाशिएको छ । उर्जा क्षेत्रमा देखिएको मूल्यवृद्धिको प्रभाव समग्र अर्थतन्त्रमा परिरहेको छ ।

मे महिनामा अमेरिकी आतिथ्य सत्कार क्षेत्रमा ७० हजार नयाँ रोजगारी थपिएको तथ्यांकले देखाउछ । जुन गत वर्षको मासिक वृद्धिको तुलनामा १४ हजार बढी हो । यस्तै खाद्य तथा पेय पर्दाथ कम्पनीहरुमा ४८ हजार काम थपिएका छन् ।

व्यवसायीहरुले भने बढ्दो खर्चका कारण होटलको बुकिङ सुस्त भईरहेको र रङ्गशालामा हेर्ने म्याचको शुल्क महङ्गो भएको गुनासो गरिरहेको बताएका छन् । डोनाल्ड ट्रम्पले समेत अमेरिका र पाराग्वेबीचको खेलका लागि १ हजार डलरको टिकेट आफूले खरिद नगर्ने बताएका थिए ।

उता फुटबलको सर्वोच्च संस्था फिफालाई समेत कृत्रिम रुपमा मूल्य बढाएको र आम दर्शकलाई भ्रममा राखेको आरोप लागेको छ ।