सेयरबजार १.५४ अंकले घट्यो, कारोबार रकम भने बढ्यो

काठमाण्डौ । आज सेयरबजार सामान्य अंकको गिरावट आएको छ। आज नेपाल स्टक एक्सचेञ्ज (नेप्से)परिसूचक ०.०५ प्रतिशत अर्थात १.५४ अंकले घटेर २ हजार ७३३.५९ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.०६ प्रतिशतले घटेर ४६९.०७ विन्दुमा झरेको छ।

आज नेप्सेमा सूचीकृत ३५७ वटा स्क्रिप्टको १ करोड २३ लाख ८२ हजार १७ कित्ता सेयर किनबेच हुँदा कुल कारोबार रकम ६ अर्ब ४४ करोड ३१ लाख बढीको सेयर कारोबार भएको छ । अघिल्लो कारोबार दिन भने ४ अर्ब ८ करोड ४८ लाख बढीको सेयर कारोबार भएको थियो।

आजको बजारबारे बजार जानकार निमानन्द कंडले भन्छन्, ‘बजारमा अन्योलता सिजर्ना कायम छ, अझैपनि लगानीकर्ताहरु पर्ख र हेरको अवस्थामा नै छन् । सरकारले लगानीकर्ताको मनोबल बढाउने नसक्दा बजार घट्ने क्रम रोकिएको छैन । सम्पत्ति शुद्धीकरण अनुसन्धानले ठूला व्यवसायी तथा लगानीकर्ता र ब्रोकरहरु बजारमा सक्रिय रुपमा लागिपरेका छैनन् ।’

उनले थपे, ‘बजारमा ट्रेडर मात्रै सक्रिय देखिन्छन् जसकारण सानो भोल्युमसहित नेप्से सूचक सामान्य उतारचढाव भइरहेको छ । बजारमा फन्डामेन्टल बलिया कम्पनीहरु चल्न सकिरहेका छैनन् । सरकारले बजारसम्बन्धी नकारात्मक कुराको निरुत्साहित गर्न सके मात्रै बजारले लय लिन सक्छ । तर लगानीकर्ताहरुले सरकारलाई आँखा चिम्लेर विश्वास भने गर्न सकिरहेका छैनन् ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये चारवटा बाहेक अन्य सबै समूहमा रातो पोतियो । आज अन्य समूह सर्वाधिक अर्थात ०.२९ प्रतिशतले बढ्यो । यस्तै होटल ०.१२, हाईड्रो ०.०१ र उत्पादन तथा प्रशोधन ०.२६ प्रतिशतले बढ्यो ।

आज फाइनान्स समूह सर्वाधिक अर्थात १.०१ प्रतिशतले घट्यो । विकास बेंक समूह पनि आज ०.०६ प्रतिशत, लगानी ०.१२, जीवन बीमा ०.३७, लघुवित्त ०.२०, म्युचुअल फण्ड ०.१५, निर्जीवन बीमा ०.४६ र व्यापार ०.३८ प्रतिशतले घट्यो ।  

सर्वाधिक कारोबार हुने कम्पनी

आज कृषि विकास बैंकको बोण्डको सर्वाधिक अर्थात ५७ करोड बढीको सेयर कारोबार भयो । यस्तै सेन्ट्रल फाइनान्सको ३५ करोड ९० लाख, एनबीबीएल डिबेञ्चर २०८५ को ३१ करोड २९ लाख, आँखुखोला जलविद्युतको २५ करोड ७५ लाख र लक्ष्मी बैंक डिबेञ्चर २०८६ को २० करोड ७३ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये दुईवटा कम्पनीको सेयरमूल्यमा मात्रै अपर सर्किट लाग्यो। आज सोपान फर्मास्युटिकल्स र कालिञ्चोक हाईड्रोको सेयरमूल्यमा मात्रै अपर सर्किट लाग्यो ।

यस्तै सप्तकोशी डेभलपमेन्ट बैंकको सेयरमूल्य १०.९८ प्रतिशत, उपकार लघुवित्तको ८.७० र अपर हेवाखोला हाईड्रोको सेयरमूल्य ६.१७ प्रतिशतले बढ्यो ।

यो दिन क्रेष्ट माईक्रो लाइफको सेयरमूल्य सर्वाधिक अर्थात ९.१६ प्रतिशतले घट्यो । यस्तै सामुदायिक लघुवित्तको सेयरमूल्य पनि आज ७.३७ प्रतिशतले खस्कियो ।