(2).gif)
.png)
काठमाण्डौ । पहिलो खेलमै पोर्चुगल अप्रत्याशित रूपमा डीआर कङ्गोसँग १–१ गोलको बराबरीमा रोकिएको छ।
उपाधिको प्रमुख दाबेदारमध्ये एक मानिएको पोर्चुगलले अग्रता लिएर पनि त्यसलाई जोगाउन नसक्दा विश्वकप अभियानको सुरुआतमै अंक गुमाउन पुगेको हो।
अमेरिकाको ह्युस्टनमा भएको प्रतिस्पर्धात्मक खेलमा पोर्चुगलले शुरुदेखि नै आक्रामक खेल प्रस्तुत गरेको थियो।
खेलको छैटौं मिनेटमा पेड्रो नेटोको आकर्षक क्रसमा युवा मिडफिल्डर जाओ नेभेसले शक्तिशाली हेडमार्फत गोल गर्दै टोलीलाई शुरुवाती अग्रता दिलाए।
प्रारम्भिक गोलपछि पोर्चुगलले खेलमाथि नियन्त्रण कायम राखे पनि थप गोल निकाल्न नसक्दा त्यसको मूल्य चुकाउनुपर्यो।
विश्वकप इतिहासमा पहिलो पटक कप्तानका रूपमा छैटौं संस्करण खेलिरहेका क्रिस्टियानो रोनाल्डोमाथि समर्थकहरूको ठूलो अपेक्षा थियो।
तर, खेलभर सक्रिय देखिए पनि उनले पाएका केही महत्वपूर्ण अवसरलाई गोलमा परिणत गर्न सकेनन्।
रोनाल्डोसहित ब्रुनो फर्नान्डेस र राफाएल लेआओको आक्रमणलाई कङ्गोको रक्षापंक्तिले प्रभावकारी रूपमा रोक्यो।
पहिलो हाफ सकिन केही क्षण बाँकी रहँदा डीआर कङ्गोले खेलमा उत्कृष्ट पुनरागमन गर्यो।
अतिरिक्त समयको पाँचौं मिनेटमा अर्थर मसुआकुको क्रसमा योआने विसाले शानदार हेड गोल गर्दै खेललाई १–१ को बराबरीमा पुर्याए।
उक्त गोलले कङ्गोका समर्थकमाझ उत्साह थप्नुका साथै टोलीलाई ऐतिहासिक अंक दिलायो।
५२ वर्षपछि विश्वकपमा पुनरागमन गरेको डीआर कङ्गोले बलियो प्रतिद्वन्द्वीविरुद्ध आत्मविश्वासपूर्ण प्रदर्शन गर्दै आफूलाई कमजोर टोलीका रूपमा नहेर्न सन्देश दिएको छ।
विशेषगरी गोलरक्षक लियोनेल एमपासीले गरेका महत्वपूर्ण बचाउ टोलीका लागि निर्णायक सावित भए।
दोस्रो हाफमा पोर्चुगलले लगातार आक्रमण गरेपनि कङ्गोले अनुशासित रक्षात्मक खेल प्रदर्शन गर्यो।
पोर्चुगलका खेलाडीहरूले सिर्जना गरेका अवसरहरू खेर जाँदा खेल बराबरीमै टुंगियो।
यो नतिजासँगै समूह ‘के’ मा पोर्चुगलमाथि दबाब बढेको छ।
विश्वकप जित्ने महत्वाकांक्षा बोकेको टोलीले अब बाँकी खेलहरूमा उत्कृष्ट प्रदर्शन गर्नुपर्ने चुनौती सामना गरिरहेको छ।
यता डीआर कङ्गोले भने शक्तिशाली टोलीबाट अंक खोस्दै आफ्नो विश्वकप यात्राको सुखद शुरुवात गरेको छ र आगामी खेलहरूका लागि आत्मबल बढाएको छ।
.png)
.jpg)
