कोटा पुगेर राहुल गान्धीले उठाए शिक्षा प्रणालीमाथि प्रश्न, ‘छात्रहरूको गुञ्ज’ अभियान शुरु

काठमाण्डौ । भारतका लोकसभामा विपक्षी नेता राहुल गान्धीले राजस्थानको कोटा शहरमा आयोजित ‘छात्रहरूको गुञ्ज’ नामक कार्यक्रममा विद्यार्थीहरूसँग प्रत्यक्ष संवाद गरेका छन्।  

कार्यक्रममा उनले देशको शिक्षा व्यवस्था, परीक्षा प्रणाली तथा बेरोजगारी जस्ता विषयमा गम्भीर प्रश्न उठाएका छन्।

राहुल गान्धीले उक्त कार्यक्रमलाई राजनीतिक गतिविधिभन्दा पनि विद्यार्थी तथा युवाहरूको समस्या उजागर गर्ने मञ्चका रूपमा प्रस्तुत गर्दै परीक्षा तयारीमा हुने अत्यधिक खर्च, बारम्बार हुने पेपर लीक घटना र बढ्दो बेरोजगारीले समग्र शिक्षा प्रणालीलाई कमजोर बनाएको टिप्पणी गरे।  

उनका अनुसार परीक्षाको तयारीमा परिवारहरूले ठूलो आर्थिक भार वहन गर्नुपर्ने अवस्था सिर्जना भएको छ र प्रणाली “आम्दानी केन्द्रित संरचना” जस्तो बन्दै गएको छ।

कार्यक्रममा नीट, यूपीएससी र जेईई तयारी गरिरहेका विद्यार्थीहरूले सहभागिता जनाएका थिए।

कोटा दशहरा मैदानमा हजारौँ विद्यार्थीको उपस्थिति रहेको कार्यक्रममा सहभागीहरूले शिक्षा प्रणालीप्रति असन्तुष्टि व्यक्त गर्दै पेपर लीक तथा प्रतिस्पर्धात्मक परीक्षाको दबाबबारे आफ्ना अनुभव साझा गरेका थिए।

कांग्रेसले यस अभियानलाई युवाहरूको भविष्य सुरक्षित गर्ने प्रयासका रूपमा व्याख्या गरेको छ।

पार्टीले कोटापछि लखनऊ, पटना र दिल्लीमा पनि यस्तै संवाद कार्यक्रम सञ्चालन गर्ने योजना सार्वजनिक गरेको छ।

यता भारतीय जनता पार्टी (भाजपा) ले भने यस कार्यक्रमको आलोचना गर्दै यसलाई “राजनीतिक नाटक” र “मनोरञ्जनात्मक प्रदर्शन” को संज्ञा दिएको छ।  

भाजपा नेताहरूले कांग्रेसमाथि युवाको मुद्दालाई राजनीतिक लाभका लागि प्रयोग गरेको आरोप लगाएका छन्।

राजनीतिक विश्लेषकहरूका अनुसार राहुल गान्धीको यो अभियान आगामी चुनाव र युवावर्गलाई लक्षित रणनीतिक पहुँच विस्तारको प्रयासका रूपमा पनि हेरिएको छ।