पूर्व अर्थमन्त्री विष्णु पौडेल सुर्खेतबाट पक्राउ, भैंसेपाटीको घरमा सम्पत्ति शुद्धिकरणको छापा

काठमाण्डौ । नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेललाई सम्पत्ति शुद्धीकरणसम्बन्धी अनुसन्धानका लागि पक्राउ गरिएको दाबी सार्वजनिक भएको छ।

स्रोतहरूका अनुसार पौडेललाई सोमबार अपराह्न सुर्खेतबाट नियन्त्रणमा लिइएको हो। उनी एमालेको चुनावी समीक्षा तथा पार्टी पुनर्गठन सुझाव संकलन कार्यदलका सदस्यका रूपमा सुर्खेत पुगेका थिए।

एमालेले देशभर पार्टीको संगठनात्मक अवस्था, चुनावी समीक्षा तथा पुनर्गठनसम्बन्धी सुझाव संकलन अभियान चलाइरहेको छ। यसअघि कार्यदलले कोशी, लुम्बिनी र सुदूरपश्चिम प्रदेशमा भेला तथा सुझाव संकलन गरिसकेको थियो। त्यसपछिको कार्यक्रमका लागि पौडेल कार्यदलको टोलीसँगै सुर्खेत पुगेका थिए।

प्रचारित विवरणअनुसार सम्पत्ति शुद्धीकरण अनुसन्धान विभागको अनुरोधमा प्रहरीले पौडेललाई नियन्त्रणमा लिएको हो। उनीमाथि सेयर कारोबार तथा सम्पत्तिको स्रोतसम्बन्धी विषयमा अनुसन्धान भइरहेको दाबी गरिएको छ।

अनुसन्धानमा संलग्न भनिएका स्रोतका अनुसार, पौडेलले आफू अर्थमन्त्री रहेका बेला केही व्यवसायीलाई लाभ पुग्ने गरी निर्णय मिलाएको, त्यसबापतको लाभ आफ्नै नाममा नदेखिने गरी अन्य व्यक्तिको नाममा सम्पत्ति खरिदमा प्रयोग भएको आशंका गरिएको छ।

यस क्रममा बुटवल क्षेत्रका एक किसानको नाममा जग्गा खरिद गरिएको, त्यस जग्गामा होटल निर्माणको योजना रहेको तथा ती व्यक्तिको आर्थिक हैसियत अस्वाभाविक रूपमा बढेको विषय पनि अनुसन्धानको दायरामा रहेको दाबी गरिएको छ। तर ती जग्गा, स्वामित्व, लगानी स्रोत वा योजनासम्बन्धी आधिकारिक कागजात सार्वजनिक भइसकेका छैनन्।

सम्पत्ति शुद्धीकरण अनुसन्धानमा प्रत्यक्ष नाममा सम्पत्ति नदेखिए पनि वास्तविक नियन्त्रण, निर्णय क्षमता वा आर्थिक लाभ कुनै व्यक्तिसँग जोडिएको देखिएमा त्यसलाई ‘अप्रत्यक्ष वास्तविक स्वामित्व’को कोणबाट हेरिन्छ। पौडेलमाथिको अनुसन्धानमा यही कोणलाई आधार बनाइएको दाबी भए पनि विभागले यसबारे औपचारिक विवरण सार्वजनिक गरेको छैन।

स्रोतहरूले भैरहवा क्षेत्रका केही कम्पनीमा केही निश्चित व्यक्तिलाई सेयर साझेदार बनाउन दबाब दिइएको, ती कम्पनीबाट प्राप्त लाभांशको हिस्सा राजनीतिक पहुँच भएका व्यक्तिसम्म पुगेको आशंका गरिएको पनि बताएका छन्। तर कम्पनीको नाम, सेयर संरचना, लाभांश विवरण वा रकमसम्बन्धी प्रमाण सार्वजनिक नभएसम्म यी दाबी स्वतन्त्र रूपमा पुष्टि भएका छैनन्।

केही विवादित पात्र र पौडेलबीच राजनीतिक तथा व्यावसायिक निकटता देखाउने भनिएका कागजात र तस्बिर अनुसन्धानमा संकलन भएको दाबी पनि गरिएको छ।  

चार पटक अर्थमन्त्री बनिसकेका पौडेल एमालेका प्रभावशाली नेतामध्ये पर्छन्। उनीमाथिको अनुसन्धान औपचारिक रूपमा पुष्टि भएमा यो केवल एक नेतामाथिको कानुनी प्रक्रिया मात्र रहने छैन, राजनीति, नीतिगत निर्णय, व्यवसायीको पहुँच र सम्पत्तिको वास्तविक स्वामित्वबीचको सम्बन्धमाथि गम्भीर बहसको विषय बन्नेछ।

यो समाचार तयार पार्दासम्म सम्पत्ति शुद्धीकरण अनुसन्धान विभाग, गृह मन्त्रालय, नेपाल प्रहरी, नेकपा एमाले तथा विष्णु पौडेलको सचिवालयबाट पक्राउ, छापा वा अनुसन्धानका आरोपबारे औपचारिक विज्ञप्ति प्राप्त भएको छैन। बिजशालाले आधिकारिक दस्तावेज, विभागीय धारणा र सम्बन्धित पक्षको प्रतिक्रिया आएपछि समाचारलाई थप तथ्यसहित अद्यावधिक गर्नेछ।