विश्वकपमा ब्राजिल र स्कटल्यान्ड भिड्दै, नेयमार खेल्ने सभावना कति ?

काठमाण्डौ । ब्राजिलको राष्ट्रिय फुटबल टोली र स्क्टल्याण्डको राष्ट्रिय टोली आज फिफा विश्वकप २०२६ को समूह ‘सी’ अन्तर्गत महत्वपूर्ण खेलमा आमनेसामने हुँदैछन्। दुवै टोली नकआउट चरणमा स्थान सुरक्षित गर्ने लक्ष्यसहित मैदान उत्रनेछन्।

ब्राजिल चार अंकसहित समूहको शीर्ष स्थानमा रहेको छ। स्कटल्यान्डविरुद्ध जित वा बराबरी खेलेमा र मोरक्कोले आफ्नो खेल जित्न नसकेमा ब्राजिल समूह विजेताका रूपमा अर्को चरणमा पुग्नेछ।

यता स्कटल्यान्ड भने आफ्नो इतिहासमै पहिलो पटक कुनै ठूलो अन्तर्राष्ट्रिय प्रतियोगिताको समूह चरण पार गर्ने लक्ष्यमा छ। टोली कम्तीमा समूहको तेस्रो स्थानमा रहने निश्चित भइसकेको छ, तर नकआउट चरणको सम्भावना बलियो बनाउन उसलाई ब्राजिलविरुद्ध सकारात्मक नतिजा आवश्यक छ।

ब्राजिलका स्टार खेलाडी नेयमार चोटमुक्त हुँदै टोलीमा उपलब्ध भएका छन्। प्रशिक्षक कार्लो एनसेलोटीले नेयमार खेल्न तयार रहेको पुष्टि गरे पनि उनी सुरुआती रोजाइमा रहने वा नरहनेबारे खुलाएका छैनन्। नेयमारले चोटका कारण समूह चरणका सुरुआती दुई खेल गुमाएका थिए।

विश्वकप इतिहासमा ब्राजिल र स्कटल्यान्डबीच यो पाँचौं भेट हुनेछ। सन् १९७४ मा दुवै टोलीले गोलरहित बराबरी खेलेका थिए भने त्यसपछि भएका तीनै विश्वकप भेटमा ब्राजिल विजयी भएको छ। स्कटल्यान्डले अहिलेसम्म विश्वकपमा कुनै पनि दक्षिण अमेरिकी टोलीलाई पराजित गर्न सकेको छैन।

तथ्यांक विश्लेषक संस्था ओप्टाका अनुसार यस खेलमा ब्राजिलको जितको सम्भावना करिब ६८ प्रतिशत रहेको छ। स्कटल्यान्डको जितको सम्भावना भने १३ प्रतिशतभन्दा कम आँकिएको छ।

मियामीमा हुने यो खेल दुवै टोलीका लागि समूह चरणको निर्णायक परीक्षा मानिएको छ, जहाँ ब्राजिल समूह विजेता बन्ने लक्ष्यमा हुनेछ भने स्कटल्यान्ड ऐतिहासिक उपलब्धिको खोजीमा मैदान उत्रिनेछ।