इन्फिनिटी लघुवित्तद्वारा दुर्गम क्षेत्रमा शैक्षिक सहयोग तथा वित्तीय साक्षरता कार्यक्रम सम्पन्न

काठमाण्डौ । संस्थागत सामाजिक उत्तरदायित्वप्रतिको आफ्नो प्रतिबद्धतालाई निरन्तरता दिँदै इन्फिनिटी लघुवित्त वित्तीय संस्था लिमिटेडले रुकुम पूर्व, रुकुम पश्चिम, रोल्पा तथा कालिकोट जिल्लामा शैक्षिक सहयोग एवं वित्तीय साक्षरता कार्यक्रम सफलतापूर्वक सम्पन्न गरेको छ । संस्थाको शाखा कार्यालय तकसेरा (रुकुम पूर्व), पेदीबजार (रुकुम पश्चिम) र बाघमारा (रोल्पा) मार्फत सञ्चालित शैक्षिक सहयोग कार्यक्रमअन्तर्गत विभिन्न सामुदायिक विद्यालयमा अध्ययनरत करिब ५०० जना विद्यार्थीलाई कापी, कलमलगायत आवश्यक शैक्षिक सामग्री वितरण गरिएको छ ।

विद्यार्थीहरूको पठनपाठनलाई थप सहज, गुणस्तरीय तथा प्रभावकारी बनाउन सहयोग पुर्याउने उद्देश्यले उक्त सामग्री हस्तान्तरण गरिएको संस्थाले जनाएको छ ।

यसैगरी, शाखा कार्यालय पलाँता (कालिकोट) ले स्थानीय तहसँगको सहकार्यमा वित्तीय सचेतना अभियान अन्तर्गत वित्तीय साक्षरता कार्यक्रम सञ्चालन गरेको छ । दुर्गम क्षेत्रका नागरिकहरूमा बचत, जिम्मेवार कर्जा उपयोग, वित्तीय अनुशासन तथा वित्तीय सेवाप्रतिको पहुँच र सचेतना अभिवृद्धि गर्ने उद्देश्यले कार्यक्रम आयोजना गरिएको थियो ।

उक्त कार्यक्रमहरू सम्बन्धित स्थानीय तहका जनप्रतिनिधि, विद्यालय व्यवस्थापन समिति, शिक्षक, अभिभावक तथा स्थानीय समुदायको उल्लेखनीय सहभागितामा सम्पन्न भएका थिए । 

सहभागीहरूले शिक्षा र वित्तीय साक्षरतामा केन्द्रित यस्ता कार्यक्रमले विद्यार्थी तथा समुदायमा सकारात्मक सोच, जिम्मेवार वित्तीय व्यवहार र गुणस्तरीय शिक्षाप्रति थप प्रेरणा जगाउने विश्वास व्यक्त गरेका थिए ।

इन्फिनिटी लघुवित्तले शिक्षा, वित्तीय समावेशीकरण तथा समुदायको दिगो विकासलाई आफ्नो संस्थागत सामाजिक उत्तरदायित्वको अभिन्न अंगका रूपमा लिँदै आएको छ । 

संस्थाका अनुसार शिक्षामा गरिएको सानो लगानीले पनि दीर्घकालीन रूपमा समाजमा सकारात्मक परिवर्तन ल्याउन सक्ने विश्वासका साथ यस्ता कार्यक्रमहरू सञ्चालन गरिएका हुन् । 

संस्थाले आगामी दिनहरूमा पनि शिक्षा, सामाजिक उत्थान, वित्तीय समावेशीकरण तथा समुदायको समग्र विकासमा योगदान पुर्याउने संस्थागत सामाजिक उत्तरदायित्वसम्बन्धी कार्यक्रमहरूलाई अझ प्रभावकारी र व्यापक रूपमा निरन्तरता दिने प्रतिबद्धता व्यक्त गरेको छ ।