रातो पासपोर्ट दुरुपयोग प्रकरणमा संविधानसभाका तीन सदस्यलाई जेल सजाय

 

काठमाण्डौ । रातो पासपोर्ट दुरुपयोग तथा कीर्ते कागजसम्बन्धी मुद्दामा उच्च अदालत पाटनले संविधानसभाका तीन पूर्वसदस्यलाई कैद र जरिवाना गर्ने जिल्ला अदालत काठमाडौंको फैसला सदर गरेको छ।

उच्च अदालत पाटनका न्यायाधीशद्वय खड्कबहादुर केसी र गोपालप्रसाद बास्तोलाको संयुक्त इजलासले गत असार २३ गते गायत्री साह, विश्वनाथप्रसाद यादव र शिवपुजन राय यादवलाई राहदानी ऐनविपरीतको कसुरमा दोषी ठहर गर्ने जिल्ला अदालतको फैसला सदर गरेको हो। फैसलाको पूर्णपाठ भने सार्वजनिक हुन बाँकी छ।

काठमाडौं जिल्ला अदालतले २०७१ जेठ २१ गते तीनै जनालाई जनही पाँच महिना कैद र ५०० रुपैयाँ जरिवानाको सजाय सुनाएको थियो।

प्रहरीले उनीहरूमाथि संविधानसभा सदस्यको हैसियतमा प्राप्त विशिष्ट कूटनीतिक राहदानी आर्थिक लाभका लागि बिचौलियालाई बिक्री गरेको आरोप लगाएको थियो। उनीहरू २०६४ सालको संविधानसभाका सदस्य हुन्।

यस मुद्दामा बिचौलियाको भूमिका निर्वाह गरेको अभियोग लागेका डिलबहादुर घर्ती, गोपाल बानियाँ, मनोजकुमार कार्की, देवेन्द्र पौडेल र सन्तोषराज उप्रेतीलाई पनि कीर्ते कागजसम्बन्धी कसुरमा दोषी ठहर गरिएको छ।

उनीहरूलाई जनही एक वर्ष कैद र पाँच लाख ५४ हजार रुपैयाँ जरिवाना तोकिएको छ।

त्यस्तै, नक्कली राहदानी प्रयोग गरी अस्ट्रेलिया जान खोजेको अभियोगमा म्याग्दीका पृथ्वी छन्त्याललाई एक वर्ष कैद र ५०० रुपैयाँ जरिवाना गर्ने जिल्ला अदालतको फैसला पनि कायम भएको छ।