अन्नपूर्ण चिनी मिलका सञ्चालकसहित दुई जना पक्राउ, उखु किसानको २२ करोड बक्यौता नदिएको आरोप

काठमाण्डौ । सर्लाहीको धनकौलस्थित अन्नपूर्ण चिनी मिलका सञ्चालक शैलेन्द्र गुप्ता र उनका सहयोगी विनोद साह कलवार उखु किसानको करिब २२ करोड रुपैयाँ बक्यौता भुक्तानी नगरेको आरोपमा पक्राउ परेका छन्।

जिल्ला प्रहरी कार्यालय सर्लाहीले किसानहरूबाट प्राप्त उजुरीका आधारमा दुवै जनालाई नियन्त्रणमा लिई ठगी तथा आपराधिक विश्वासघातसम्बन्धी कसुरमा अनुसन्धान अघि बढाएको जनाएको छ।

जिल्ला प्रहरी कार्यालय सर्लाहीका प्रवक्ता डीएसपी बेदप्रसाद गौतमका अनुसार मिलले गत आर्थिक वर्षमा किसानहरूबाट खरिद गरेको उखुको रकम लामो समयदेखि भुक्तानी नगरेपछि पीडित किसानहरूले प्रहरीमा उजुरी दिएका थिए। किसानहरूको दाबीअनुसार मिलले करिब २२ करोड रुपैयाँ बराबरको रकम तिर्न बाँकी छ।

प्रहरीका अनुसार किसान र मिल व्यवस्थापनबीच पटक–पटक छलफल गरी बक्यौता रकम भुक्तानी गराउने प्रयास गरिएको थियो। तर, उद्योग पक्षले रकम भुक्तानी नगरेपछि कानुनी प्रक्रिया अघि बढाइएको हो।

प्रहरीले पक्राउ परेका गुप्ता र कलवारविरुद्ध सर्लाही जिल्ला अदालतबाट म्याद थप गरी थप अनुसन्धान भइरहेको जनाएको छ।