खेतमा घाटा, बजारमा महँगी : माइतीघरमा गोलभेँडा पोखेर किसानको आक्रोश

 

काठमाण्डौ ।  उत्पादन लागतसमेत नउठ्ने गरी गोलभेँडाको मूल्य खस्किएको भन्दै किसानहरूले काठमाडौंको माइतीघर मण्डलामा गोलभेँडा सडकमा पोखेर विरोध प्रदर्शन गरेका छन्।

बुधबार बिहान विभिन्न कृषि फार्मबाट गोलभेँडा लिएर माइतीघर पुगेका किसानहरूले बजारमा बिचौलियाको दबदबा कायम रहेको र उत्पादकले उचित मूल्य पाउन नसकेको भन्दै सरकारको ध्यानाकर्षण गराएका हुन्।

प्रदर्शनमा सहभागी किसान बम तामाङले किसानको खेतबारीमा गोलभेँडा कुहिने अवस्था हुँदा उपभोक्ताले भने महँगो मूल्य तिर्नुपरेको बताए। उत्पादक र उपभोक्ताबीचको मूल्य अन्तर अस्वाभाविक रहेको भन्दै उनले बिचौलिया नियन्त्रणका लागि सरकारले प्रभावकारी कदम चाल्नुपर्ने माग गरे।

किसानहरूले गोलभेँडा तथा अन्य तरकारीको न्यूनतम समर्थन मूल्य निर्धारण गर्न, कृषि बिमा प्रभावकारी रूपमा लागू गर्न, उत्पादन लागतका आधारमा बजार मूल्य सुनिश्चित गर्न र कृषि उपजको सहज बजारीकरणको व्यवस्था गर्न माग गरेका छन्।

उनीहरूले आफ्ना माग सम्बोधन नभए आन्दोलनलाई थप सशक्त बनाउने चेतावनीसमेत दिएका छन्।