एलपी ग्यासमा हुने कालोबजारी नियन्त्रण गर्न सरकारलाई निर्देशन

काठमाण्डौ । प्रतिनिधिसभाको उद्योग तथा वाणिज्य र श्रम तथा उपभोक्ताहित समितिले एलपी ग्यासमा देखिएका कालोबजारी, कृत्रिम अभाव तथा आपूर्ति व्यवस्थापनसम्बन्धी समस्या नियन्त्रण गर्न उद्योग, वाणिज्य तथा आपूर्ति मन्त्रालयलाई निर्देशन दिएको छ।

सिंहदरबारमा आज बसेको समितिको बैठकले ग्यासको सहज र दीर्घकालीन आपूर्तिका लागि आवश्यक पहल गर्न मन्त्रालयलाई निर्देशन दिएको हो। 

समितिका सभापति रहबर अन्सारीले एलपी ग्यास आपूर्तिलाई व्यवस्थित बनाउन पाइपलाइन विस्तारको सम्भाव्यता, प्रभाव र आवश्यक पूर्वाधारबारे अध्ययन तथा अनुसन्धान गरी सात दिनभित्र समितिमा प्रतिवेदन बुझाउन निर्देशन दिए।

बैठकमा पुराना ग्यास सिलिन्डरको प्रयोगबाट उपभोक्तामा पर्न सक्ने जोखिमबारे पनि छलफल भएको थियो।

सभापति अन्सारीले उपभोक्ताको सुरक्षालाई ध्यानमा राख्दै नेपाल एलपी ग्यास उद्योग, नेपाल आयल निगम र मन्त्रालयको समन्वयमा नियमित अनुगमन गरी सिलिन्डरको गुणस्तर परीक्षण सुनिश्चित गर्न निर्देशन दिए।