नेपाल टी२० विश्वकप २०२८ मा सिधै ग्लोबल छनोटमा प्रतिस्पर्धा गर्ने

 काठमाण्डौ । नेपाली किक्रेट टोलीले सन् २०२८ को टी२० विश्वकपका लागि सिधै ग्लोबल छनोट खेल्ने भएको छ । 

आईसीसीले सन् २०२८ को टी–२० विश्वकपको छनोट प्रक्रिया सार्वजनिक गर्दा नेपालले ग्लोबल छनोटमा सिधै खेल्ने भएको हो ।

आईसीसीका अनुसार सन् २०२६ को टी–२० विश्वकप खेलेका तर स्वतः विश्वकपमा स्थान बनाउन नसकेका टोलीहरू अब सिधै ग्लोबल छनोटमा प्रवेश गर्नेछन् । नेपाल पनि सो समूहमा परेकाले उसले एसिया क्षेत्रीय छनोट खेल्नुपर्ने छैन ।

नेपालले टी–२० विश्वकप २०२६ मा समूह चरणबाटै आफ्नो यात्रा टुंग्याएको थियो । त्यसैले टोलीले स्वतः विश्वकपमा स्थान बनाउन नसके पनि सिधै ग्लोबल छनोटमा प्रतिस्पर्धा गर्ने अवसर भने सुरक्षित गरेको छ। ग्लोबल छनोटमा क्षेत्रीय छनोटबाट आउने आठ टोली थपिनेछन् । अफ्रिका, एसिया र युरोपबाट दुई–दुई तथा अमेरिका र पूर्वी एसिया–प्रशान्त क्षेत्रबाट एक–एक टोली ग्लोबल छनोटमा पुग्नेछन् ।

ग्लोबल छनोटपछि प्रत्येक क्षेत्रबाट उत्कृष्ट प्रदर्शन गर्ने एक–एक टोली र समग्रमा उत्कृष्ट थप तीन टोली गरी सात टोलीले टी–२० विश्वकप २०२८ मा स्थान बनाउनेछन्। आईसीसीले यसका लागि न्यूनतम प्रदर्शनको मापदण्ड पनि लागू गर्ने जनाएको छ । यसअघि विश्वकप छनोटका लागि एसिया इएपी, युरोपियन, अमेरिकन र अफ्रिकन छनोट हुँदै आएकोमा ग्लोबल छनोट फेरि जुर्मुराएको हो ।

 

यो सँगै आईसीसीले टी२० विश्वकपको फर्म्याटमा पनि परिवर्तन गरेको छ । यो परिवर्तन आईसीसीको सम्मेलनबाट पारित भइसकेको र तर अन्तिम स्वीकृति भने नोभेम्बरमा हुने छलफलपछि दिइने जनाएको छ ।