नेप्सेमा दोहोरो अंकको गिरावट, एउटा बाहेक सबै समूह राताम्मे

Capital Market
बिहीबार, श्रावण २१,२०८३ 15:19:38

काठमाण्डौ । अघिल्लो दिन ४.७९ अंकले बढेको सेयरबजारमा आज दोहोरो अंकको गिरावट आएको छ । आज नेपाल स्टक एक्सचेञ्ज (नेप्से) परिसूचक ०.५१ प्रतिशत अर्थात १३.८२ अंकले घटेर २ हजार ६५४.१५ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स भने ०.५६ प्रतिशतले घटेर ४६४.७३ विन्दुमा झरेको छ ।

आज नेप्सेमा सूचीकृत ३४७ वटा स्क्रिप्टको १ करोड ८ लाख ४ हजार ४२६ कित्ता सेयर किनबेच हुँदा कुल कारोबार रकम ४ अर्ब ६२ करोड २७ लाख बढीको सेयर कारोबार भएको छ । अघिल्लो दिन भने ४ अर्ब ४० करोड बढीको सेयर कारोबार भएको थियो ।

आजको बजारबारे टेकेन्द्र थपलिया भन्छन्, ‘बजारमा पछिल्लो केही समयदेखि ठूला लगानीकर्ता प्रवेश गरेका छैनन । जसका कारण बजारमा गतिलो वृद्धि देख्न सकिएको छैन । ठूला लगानीकर्ताले बजारलाई चलायमान बनाईराख्ने भएकाले ठूला लगानीकर्ता बजार प्रवेश नगरेसम्म बजारको अवस्था यस्तै होला भनेर भन्न सकिने अवस्था छैन ।’

उनले सरकारले समेत पूँजीबजारलाई उकास्ने खालको नीति अबलम्बन गर्नुपर्ने र कार्यान्वयनमा ध्यान दिनुपर्ने बताए ।

कुन समूहमा भयो कतिको थपघट ?

आज कारोबारमा आएका १३ वटै समूहमध्ये एउटा बाहेक अन्य सबैमा रातो पोतियो । आज व्यापार समूह मात्रै बढ्यो । आज व्यापार समूह ०.५९ प्रतिशतले बढ्यो ।

यो दिन उत्पादन तथा प्रशोधन समूह सर्वाधिक अर्थात ०.८८ प्रतिशतले घट्यो । यस्तै बैंकिङ समूह ०.८४ प्रतिशत, विकास बैंक ०.३८, फाइनान्स ०.१०, होटल ०.४६, हाईड्रो ०.३८, लगानी ०.३०, जीवन बीमा ०.६७, लघुवित्त ०.३०, म्युचुअल फण्ड ०.६५, निर्जीवन बीमा ०.७३ र अन्य ०.२८ प्रतिशतले घट्यो ।

सर्वाधिक कारोबार हुने कम्पनी

आज रिडी पावरको सर्वाधिक सेयर कारोबार भयो । यो कम्पनीको आज ४७ करोड २४ लाख बढीको सेयर कारोबार भयो । यस्तै आँखुखोला जलविद्युतको २६ करोड ५९ लाख, सोलु हाईड्रोपावरको २३ करोड ७९ लाख, नेशनल हाईड्रोपावरको १९ करोड ४२ लाख र खानीखोला हाईड्रोको १६ करोड ९३ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा मात्रै कम्पनीको सेयरमूल्यमा अपर सर्किट लाग्यो । आज अपर लोहरे खोला हाईड्रोको सेयरमूल्यमा मात्रै अपर सर्किट लाग्यो ।

यस्तै कालंगा हाईड्रोको सेयरमूल्य ४.६२ प्रतिशत र सानिगाड हाईड्रोको सेयरमूल्य २.४६ प्रतिशतले बढ्यो ।

यो दिन एलएस होराइजन१२ को मूल्य सर्वाधिक अर्थात ६.५० प्रतिशतले घट्यो ।