सेयरबजारको गिरावट आजपनि जारी, ‘पर्ख र हेरको अवस्थामा लगानीकर्ता’

काठमाण्डौ । सेयरबजारको गिरावट आजपनि जारी रहेको छ । आज नेपाल स्टक एक्सचेञ्ज (नेप्से) परिसूचक ०.१५ प्रतिशत अर्थात ४.०५ अंकले घटेर २ हजार ६५०.०९ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.२५ प्रतिशतले घटेर ४६३.५६ विन्दुमा झरेको छ ।

आज नेप्सेमा सूचीकृत ३३४ वटा स्क्रिप्टको १ करोड ३ लाख १३ हजार ९७९ कित्ता सेयर किनबेच हुँदा कुल कारोबार रकम ३ अर्ब ७७ करोड ४३ लाख बढीको सेयर कारोबार भएको छ । अघिल्लो दिन भने ४ अर्ब ६२ करोड बढीको सेयर कारोबार भएको थियो ।

नेपाल इन्भेष्टर्स फोरमका अध्यक्ष तुलसीराम ढकाल भन्छन्, ‘सेयरबजार बढ्नका लागि सबै पक्ष सकारात्मक हुँदाका वाबजुत पनि बजार बढ्न सकिरहेको छैन । यतिबेला लगानीकर्ताहरुको कन्फिडेन्ट राम्रो नहुँदा पूँजीबजारले लय लिन नसकेको अवस्था छ । बैंकिङ क्षेत्रमा तरलता फालाफाल छ, सस्तो ब्याजदरमै लोन पाइरहेको छ, तर बजारमा अपेक्षित पैसा आउन सकिरहेको छैन । यस्तो अवस्थाले अहिले लगानीकर्ताहरु ‘पर्ख र हेर’ कै अवस्थामा छन् भन्ने बुझिन्छ ।’

उनले भने, ‘अहिलेको बजारको अवस्था हेर्दा त्यति धेरै तल घटेको पनि छैन र माथि उक्लिन पनि सकिरहेको छैन । न्यून कारोबारमा बजार सीमित भइरहेको अवस्थामा सरकारले लगानीकर्ताको मनोबल उच्च बनाउने कार्य गर्न आवश्यक छ । बजारको लागि सिजन भएपनि लगानीकर्ताहरु सक्रिय नदेखिदा बजारको गति बढ्न सकिरहेको छैन । अब सरकारले नै लगानीकर्ताको कन्फिडेन्ट बढाउनुपर्ने देखिन्छ तबमात्र बजार माथि जाने देखिन्छ र लगानीकर्ताहरु फेरी बजारमा सक्रिय भई लगानी गर्न आउनेछन् ।’

कुन समूहमा भयो कतिको थपघट ?

आज कारोबारमा आएका १३ वटै समूहमध्ये चारवटा बाहेक अन्य सबैमा रातो पोतियो । आज म्युचुअल फण्ड समूह सर्वाधिक अर्थात ०.५२ प्रतिशतले बढ्यो । यस्तै उत्पादन तथा प्रशोधन समूह ०.२५, लघुवित्त ०.०१ र व्यापार ०.१९ प्रतिशतले बढ्यो ।  

यो दिन फाइनान्स समूह सर्वाधिक अर्थात ०.७० प्रतिशतले घट्यो । यस्तै बैंकिङ समूह ०.२४ प्रतिशत, विकास बैंक ०.२१, होटल ०.२७, हाईड्रो ०.१३, लगानी ०.१७, जीवन बीमा ०.३१, निर्जीवन बीमा ०.२४ र अन्य ०.१४ प्रतिशतले घट्यो ।

सर्वाधिक कारोबार हुने कम्पनी

आज सोलु हाईड्रो पावरको सर्वाधिक सेयर कारोबार भयो । यो कम्पनीको आज ३९ करोड २५ लाख बढीको सेयर कारोबार भयो । यस्तै रिडी पावर कम्पनीको २३ करोड २ लाख, सानिमा बैंक लिमिटेडको १७ करोड ८ लाख, खानीखोला हाईड्रोको १३ करोड ६१ लाख र आँखुखोला जलविद्युतको ११ करोड ७९ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कुनैपनि कम्पनीहरुको सेयरमूल्यमा अपर सर्किट लागेन । आज आत्मनिर्भर लघुवित्तको सेयरमूल्य सर्वाधिक अर्थात ८.५४ प्रतिशतले बढ्यो । यस्तै एनएलआई लार्ज क्याप फण्डको मूल्य ५.१८ प्रतिशत, एनआईसी एशिया ब्यालेन्स्ड फण्डको ५.१६ र एनआईसी एशिया सेलेक्ट फण्ड ३० को मूल्य ३.९७ प्रतिशतले बढ्यो ।  

यो दिन अपर लोहरे खोला हाईड्रोको मूल्य सर्वाधिक अर्थात ६.९३ प्रतिशतले घट्यो ।