सुदूरपश्चिमका मुख्यमन्त्री खगराज भट्टले पाए विश्वासको मत

NEWS
बुधबार, भाद्र ३,२०८३ 15:31:44

काठमाण्डौ। सुदूरपश्चिम प्रदेशका मुख्यमन्त्री खगराज भट्टले प्रदेश सभाबाट विश्वासको मत प्राप्त गरेका छन्। साउन २९ गते मुख्यमन्त्रीमा नियुक्त भएका भट्टले आज प्रदेश सभामा विश्वासको मत लिएका हुन्।

विश्वासको मतसम्बन्धी प्रस्तावको पक्षमा ३१ सांसदले मतदान गरेका छन्। भट्टको पक्षमा नेकपा (एमाले)का ११ र नेकपाका २० सांसदले मतदान गरेका हुन्।

नेकपाका तर्फबाट साविक नेकपा ९माओवादी केन्द्र०का सभामुखबाहेक १० जना, साविक नागरिक उन्मुक्ति पार्टीका ७ जना तथा साविक नेकपा (एकीकृत समाजवादी)का निलम्बित सांसदबाहेक ३ जनाले मुख्यमन्त्री भट्टको पक्षमा मतदान गरेका छन्।

यस्तै, विश्वासको मतको विपक्षमा नेपाली कांग्रेसका १४ र राष्ट्रिय प्रजातन्त्र पार्टी (राप्रपा)का १ सांसदले मतदान गरेका छन्। कांग्रेसका पदम शाही, मानबहादुर रावल र मधु भारती भने मतदानमा उपस्थित भएनन्।

५१ सदस्यीय सुदूरपश्चिम प्रदेश सभामा केही सांसदको पद रिक्त तथा निलम्बनमा रहेकाले हाल कायम सदस्य संख्याका आधारमा विश्वासको मतको प्रक्रिया अघि बढाइएको हो।

डडेल्धुराबाट निर्वाचित तारा जोशीले सांसद पदबाट राजीनामा दिएर प्रतिनिधिसभा निर्वाचनमा उम्मेदवारी दिएका छन्। यस्तै, कैलालीबाट निर्वाचित प्रकाश देउवाको पद रिक्त रहेको छ भने सोही जिल्लाबाट निर्वाचित अर्का सांसद दीर्घ सोडारी निलम्बनमा छन्।