बिग्रँदो स्वास्थ्यपछि इमरान खान जेलबाट निजी अस्पतालमा, सर्वोच्चको आदेशमा उपचार सुरु

 

काठमाण्डौ । पाकिस्तानका पूर्वप्रधानमन्त्री तथा विश्वकप विजेता पूर्वक्रिकेट कप्तान इमरान खानलाई स्वास्थ्य अवस्था बिग्रिएपछि जेलबाट निजी अस्पतालमा सारिएको छ। पाकिस्तानको सर्वोच्च अदालतको आदेशपछि उनलाई आदियाला जेलबाट इस्लामाबादस्थित शिफा इन्टरनेसनल अस्पताल लगिएको हो।

७३ वर्षीय खानलाई शुक्रबार बिहान कडा सुरक्षा व्यवस्थाबीच अस्पताल पुर्‍याइएको बताइएको छ। उनको स्वास्थ्य अवस्थाबारे लामो समयदेखि उठिरहेको चिन्तालाई ध्यानमा राख्दै सर्वोच्च अदालतले विभिन्न विशेषज्ञ चिकित्सक सम्मिलित टोलीबाट विस्तृत स्वास्थ्य परीक्षण तथा आवश्यक उपचार गराउन निर्देशन दिएको थियो।

इमरान खानको पार्टी पाकिस्तान तेहरिक–ए–इन्साफ (पीटीआई) ले पनि उनलाई जेलबाट अस्पताल सारिएको पुष्टि गरेको छ। पार्टी तथा उनको कानुनी टोलीले पछिल्ला महिनादेखि जेलभित्र खानको स्वास्थ्य अवस्था निरन्तर कमजोर बन्दै गएको भन्दै पर्याप्त उपचारको व्यवस्था गर्न माग गर्दै आएका थिए।

पीटीआईका अनुसार उपचारमा ढिलाइ हुँदा एक समय इमरानको दाहिने आँखाको दृष्टि गम्भीर रूपमा प्रभावित भएको थियो। उनको आँखाको दृष्टि करिब १५ प्रतिशतमा झरेको दाबीसमेत पार्टीले गरेको थियो। त्यसपछि उनलाई केही पटक सरकारी अस्पतालमा छोटो समयका लागि लगेर परीक्षण गरिएको भए पनि दीर्घकालीन तथा विशेषज्ञ उपचारको आवश्यकता रहेको आवाज उठ्दै आएको थियो।

इमरान खानको स्वास्थ्य अवस्थालाई लिएर पाकिस्तानभित्र मात्र होइन, अन्तर्राष्ट्रिय क्रिकेट जगतबाट समेत चासो व्यक्त भएको थियो। यसअघि ग्रेग च्यापेल, सुनील गावस्कर र कपिल देवसहित १४ जना पूर्वअन्तर्राष्ट्रिय क्रिकेट कप्तानले पाकिस्तानका प्रधानमन्त्री शहबाज शरीफलाई खुला पत्र लेख्दै खानलाई मानवीय व्यवहार गर्न र उचित उपचारको व्यवस्था मिलाउन आग्रह गरेका थिए।

विश्व क्रिकेटमा पाकिस्तानलाई सन् १९९२ को एकदिवसीय विश्वकप जिताएका इमरान पछि राजनीतिमा प्रवेश गरेका थिए। उनी पाकिस्तानको प्रधानमन्त्रीसमेत बनेका थिए। राजनीतिक सत्ता गुमाएपछि विभिन्न मुद्दामा कानुनी कारबाही सामना गर्दै आएका खान सन् २०२३ अगस्टदेखि आदियाला जेलमा छन्।

उनीमाथि भ्रष्टाचारलगायत विभिन्न मुद्दामा सजाय सुनाइएको छ। तर इमरान खान र उनको पार्टी पीटीआईले ती सबै मुद्दालाई अस्वीकार गर्दै आएका छन्। उनीहरूको दाबी छ कि खानविरुद्ध लगाइएका आरोप राजनीतिक प्रतिशोधबाट प्रेरित छन्।

स्वास्थ्य अवस्था बिग्रिएपछि सर्वोच्च अदालतको प्रत्यक्ष हस्तक्षेपमा निजी अस्पताल सारिएको घटनाले पाकिस्तानको राजनीतिक वृत्तमा फेरि इमरान खानको स्वास्थ्य, जेल बसाइ र उनीमाथिको कानुनी कारबाहीबारे बहस चर्काउने देखिएको छ।