घटेर २५ सय विन्दुको लाइनमा आईपुग्यो नेप्से, जानकार भन्छन्, ‘सरकारप्रति लगानीकर्ताको अविश्वासको परिणाम’

काठमाण्डौ । साताको पहिलो कारोबार दिन सेयरबजार दोहोरो अंकले घटेको छ । आज नेपाल स्टक एक्सचेञ्ज (नेप्से) परिसूचक ०.७३ प्रतिशत अर्थात १९.१३ अंकले घटेर २ हजार ५९९.५८ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.६८ प्रतिशतले घटेर ४५८.१८ विन्दुमा झरेको छ ।

आज नेप्सेमा सूचीकृत ३५० वटा स्क्रिप्टको ८५ लाख ७२ हजार ९७० कित्ता सेयर किनबेच हुँदा कुल कारोबार रकम ३ अर्ब ३२ करोड ३९ लाख बढीको सेयर कारोबार भएको छ । गत शुक्रबार भने ४ अर्ब १६ करोड बढीको सेयर कारोबार भएको थियो ।

आजको बजारबारे नेपाल सेयरधनी संघका अध्यक्ष घनश्याम पाण्डे भन्छन्, ‘पछिल्लो समय बजार लगातार घट्दै जानुमा सरकारप्रति लगानीकर्ताहरुको अविश्वास हो । अहिलेको सरकारको कामकारबाहीप्रति लगानीकर्ता सन्तुष्ट छैनन् र विश्वास पनि गर्न सकिरहेका छैनन् । सरकारले लगानीको वातावरण राम्रो बनाउँदै जानुको सट्टा ठूला लगानीकर्तालाई तर्साउने, धम्काउने र भगाउने कार्य गरेको छ ।’

उनले थपे, ‘अर्थमन्त्रीले समेत सेयरबजारमा ‘पम्प एण्ड डम्प’ गर्दैन भन्दै हिड्नुभएको छ, यसले झनै लगानीकर्ताको सेन्टिमेन्टमा नकारात्मक प्रभाव पारेको छ । नत्र बजार अहिले यो सिजनमा यसरी घट्नुपर्ने कुनै कारण थिएन । बजारमा पैसा पनि प्रशस्त छ, तर लगानीकर्ताहरुले बजारमा लगानी थप्न डराइरहेका छन् । परिपक्व लिडरसिप नहुँदा लगानीको वातावरण उचित बनेको छैन । पोलिसी पनि प्रभावकारी देखिदैन । बजार आज २५ सयको विन्दुमा झरिसकेको छ । सम्भवतः यो भन्दा तल नजाला भन्ने मात्रै आश छ ।’

Sponsored

Sponsored

कुन समूहमा भयो कतिको थपघट ?

आज कारोबारमा आएका १३ वटै समूहमा रातो पोतिएको छ । आज हाईड्रो समूह सर्वाधिक अर्थात १.१९ प्रतिशतले घट्यो । यस्तै बैंकिङ समूह ०.६७, विकास बैंक ०.४७, फाइनान्स ०.८०, होटल ०.०१, लगानी ०.४१, जीवन बीमा ०.८१, उत्पादन तथा प्रशोधन ०.४६, लघुवित्त ०.५३, म्युचुअल फण्ड ०.८०, निर्जीवन बीमा १.१२, अन्य ०.७८ र व्यापार समूह ०.५० प्रतिशतले घट्यो ।

सर्वाधिक कारोबार हुने कम्पनी

आज रिलायन्स स्पीनिङ मिल्सको सर्वाधिक कारोबार भयो । यो कम्पनीको आज १२ करोड ७२ लाख बढीको सेयर कारोबार भयो । यस्तै सोलु हाईड्रोको ११ करोड ८८ लाख, साहस उर्जाको १० करोड ६५ लाख, रिडी पावरको ९ करोड ४० लाख र एक्सेल डेभलपमेन्ट बैंकको ७ करोड ५६ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये एउटा कम्पनीको सेयरमूल्यमा मात्रै अपर सर्किट लाग्यो । आज सर्वोत्तम पेन्ट्सको सेयरमूल्यमा मात्रै अपर सर्किट लाग्यो ।

यस्तै धौलागिरी लघुवित्तको सेयरमूल्य ११.९८ प्रतिशत, सिवाईसी नेपाल लघुवित्तको ९.१४ र सयपत्री हाईड्रोको सेयरमूल्य ६.२७ प्रतिशतले बढ्यो ।  

यो दिन पञ्चकन्या माई हाईड्रोको सेयरमूल्य सर्वाधिक अर्थात ९.८३ प्रतिशतले घट्यो ।