सेयरबजारको गिरावट आजपनि जारी, कारोबार रकममा सामान्य सुधार

काठमाण्डौ । मंगलबारको कारोबारका दिन सेयरबजार सामान्य अंकले घटेको छ । आज नेपाल स्टक एक्सचेञ्ज (नेप्से) परिसूचक ०.२० प्रतिशत अर्थात ५.३० अंकले घटेर २ हजार ५९४.९७ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.११ प्रतिशतले घटेर ४५७.६७ विन्दुमा झरेको छ ।

आज नेप्सेमा सूचीकृत ३५७ वटा स्क्रिप्टको १ करोड ४४ हजार १६४ कित्ता सेयर किनबेच हुँदा कुल कारोबार रकम ४ अर्ब १० करोड ९७ लाख बढीको सेयर कारोबार भएको छ । अघिल्लो दिन भने ३ अर्ब ३२ करोड ३९ लाख बढीको सेयर कारोबार भएको थियो ।

आजको बजारबारे बजार जानकार विरेन्द्र विष्ट भन्छन् ,‘सेयर बजार घट्नुमा सरकारको धरपकडका कारण लगानीकर्ताको आत्मविश्वास घट्नु नै मुख्य कारण हो । यस्तै  अर्थमन्त्रीको गैर जिम्मेवारी बोलीले समेत आगोमा घ्यु थप्ने काम गरेको छ । सरकारले व्यापारीलाई थुन्दा र लगानकिर्तालाई धरपकडले गर्दा गएको २–३ महिनादेखि सेयर बजारमा गिरावाट आइरहेको छ ।’

सरकारले लगानीकर्ताको विश्वास जितेर सेयरबजारमैत्री वातारण बनाए मात्रै अब बजारमा सुधार देखिने समेत उनले स्पष्ट पारे ।  

Sponsored

Sponsored

कुन समूहमा भयो कतिको थपघट ?

आज कारोबारमा आएका १३ वटा समूहमध्ये दुईवटा बाहेक अन्य सबैमा रातो पोतिएको छ । आज विकास बैंक र निर्जीवन बीमा समूह मात्रै बढे । यी समूहहरु क्रमशः ०.०८ र ०.३६ प्रतिशतले बढे ।

आज फाइनान्स समूह सर्वाधिक अर्थात ०.९१ प्रतिशतले घट्यो । यस्तै बैंकिङ समूह ०.०३, होटल ०.७१, हाईड्रो ०.४२, लगानी ०.०८, जीवन बीमा ०.०९, उत्पादन तथा प्रशोधन ०.२९, लघुवित्त ०.२७, म्युचुअल फण्ड ०.५३, अन्य ०.१८ र व्यापार ०.५७ प्रतिशतले घट्यो ।

सर्वाधिक कारोबार हुने कम्पनी

आज मकर जितुमाया सुरी हाईड्रोको सर्वाधिक कारोबार भयो । यो कम्पनीको आज ९० करोड ७ लाख बढीको सेयर कारोबार भयो । यस्तै रिलायन्स स्पीनिङ मिल्सको १७ करोड ७१ लाख, सोलु हाईड्रोपावरको १३ करोड ७६ लाख, सुपर मादी हाईड्रोको १२ करोड ८५ लाख र रिडी पावर कम्पनीको १२ करोड २५ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये दुईवटा कम्पनीको सेयरमूल्यमा मात्रै अपर सर्किट लाग्यो । आज सर्वोत्तम पेन्ट्स र क्रेष्ट माइक्रो लाइफको सेयरमूल्यमा मात्रै अपर सर्किट लाग्यो ।

यस्तै नाडेप लघुवित्तको सेयरमूल्य ६ प्रतिशत, एभरेष्ट कलरको ५.७१ र कालिञ्चोक हाईड्रोको सेयरमूल्य ५.५६ प्रतिशतले बढ्यो ।  

यो दिन धौलागिरी लघुवित्तको सेयरमूल्य सर्वाधिक अर्थात १०.०७ प्रतिशतले घट्यो ।