कम्पनी नै दर्ता नगरी १८ वर्षदेखि चकलेट उत्पादन, सूर्य कन्फेस्नरीमा प्रहरीको ताला

NEWS
बिहीबार, भाद्र १८,२०८३ 17:23:39

काठमाण्डौ । कम्पनी दर्ता नै नगरी विगत १८ वर्षदेखि चकलेट उत्पादन गरी बजारमा बिक्री वितरण गर्दै आएको आरोपमा काठमाण्डौको एक चकलेट उत्पादन केन्द्रमा प्रहरीले ताला लगाएको छ।

राष्ट्रिय अनुसन्धान विभागबाट प्राप्त सूचनाका आधारमा जिल्ला प्रहरी परिसर काडमाण्डौले उक्त उत्पादन केन्द्रमा अनुगमन गरी कारबाही अघि बढाएको हो। प्रहरीले ‘सूर्य कन्फेस्नरी’ नामको लेबल प्रयोग गरेर चकलेट उत्पादन तथा बजारमा पठाउने गरिएको पाइएको जनाएको छ।

उक्त नाममा कम्पनी दर्ता नभएको र लामो समयदेखि उत्पादन भइरहेको प्रारम्भिक अनुसन्धानबाट खुलेको छ। गत ९ भदौमा उत्पादन केन्द्रमा ताला लगाएर थप कारबाहीका लागि खाद्य प्रविधि तथा गुण नियन्त्रण विभागलाई जिम्मा लगाइएको अधिकारीहरूले बताएका छन्।

अधिकारीहरूका अनुसार उक्त स्थानबाट २०६६ सालदेखि चकलेट उत्पादन गरी बजारमा पठाउने गरिएको थियो।

खाद्य स्वच्छता तथा गुणस्तरसम्बन्धी कानुनी व्यवस्थाअनुसार खाद्य पदार्थ उत्पादन तथा बजारमा बिक्री गर्नुअघि सम्बन्धित निकायमा अनिवार्य दर्ता गरी आवश्यक प्रयोगशाला परीक्षण तथा गुणस्तरसम्बन्धी मापदण्ड पूरा गर्नुपर्ने हुन्छ।

तर सूर्य कन्फेस्नरीले आवश्यक प्रक्रिया पूरा नगरी चकलेट उत्पादन तथा बिक्री वितरण गरेको प्रारम्भिक अनुसन्धानबाट देखिएको सुरक्षा अधिकारीहरूको दाबी छ।

उक्त उत्पादन केन्द्रबाट उत्पादित चकलेट देशका विभिन्न स्थानमा पठाउने गरिएको समेत पाइएको छ। अनुसन्धानका क्रममा नयाँ बसपार्क, कलंकी, कोटेश्वर र गौशालालगायतका क्षेत्रमा चकलेट भण्डारण गर्ने गरिएको खुलेको बताइएको छ।

विदेशी ब्रान्डका चकलेटसँग मिल्दोजुल्दो आकारमा उत्पादन गरी उपभोक्तालाई झुक्याउने प्रयास गरिएको तथा विभिन्न पसलमा फरक–फरक मूल्यमा बिक्री गर्ने गरिएको समेत अनुसन्धानबाट खुलेको अधिकारीहरूले बताएका छन्।