लन्डनमा उबरले शुरु गर्यो एआई प्रविधिमा आधारित रोबोट्याक्सी सेवा, शुल्क २०% बढी

विश्व अर्थतन्त्र
आईतवार, भाद्र २१,२०८३ 10:22:12

काठमाण्डौ । उबरले बेलायतको राजधानी लन्डनमा एआई प्रविधिमा आधारित स्वचालित ट्याक्सी अर्थात् रोबोट्याक्सी सेवा शुरु गरेको छ। बेलायती प्रविधि कम्पनी वेभसँगको सहकार्यमा उबरले १५ वटा स्वचालित फोर्ड मस्टाङ म्याक–ई विद्युतीय सवारीसाधन सञ्चालनमा ल्याएको हो।

हाल ती सवारीसाधन पूर्ण रूपमा चालकविहीन भने छैनन्। लन्डनका नियामक निकायले सार्वजनिक सडकमा पूर्ण स्वचालित सवारी सञ्चालनलाई अझै अनुमति नदिएका कारण प्रत्येक सवारीमा एक जना सुपरभाइजर अनिवार्य रूपमा उपस्थित रहने व्यवस्था गरिएको छ।

नयाँ रोबोट्याक्सीले लन्डनभित्र यात्रु ओसारपसार गर्न सक्ने भए पनि हालसम्म विमानस्थलसम्मको सेवा उपलब्ध छैन। रोबोट्याक्सी बुक गर्दा लाग्ने भाडा सामान्य उबर सेवाको तुलनामा करिब २० प्रतिशत बढी रहेको छ।

सीबीएस न्युजका पत्रकारहरूले गरेको परीक्षण यात्राका क्रममा सवारीले सुरुमा स्वचालित रूपमा यात्रा गरेको थियो। तर साँघुरो बाटोमा पुगेपछि सवारी अघि बढ्न नसकेपछि सुपरभाइजरले नियन्त्रण आफ्नो हातमा लिनुपरेको थियो।

वेभका अधिकारी केन्डलका अनुसार लन्डनको पुरानो र जटिल सडक सञ्जाल कम्पनीका लागि प्रमुख चुनौती हो। लन्डनका केही सडक सयौँ वर्ष पुराना छन् भने शहरमा धेरै राउन्डअबाउट तथा जटिल सडक अन्तरक्रियाका अवस्था देखिने गर्छन्।

उनका अनुसार लन्डनमा सान फ्रान्सिस्कोको तुलनामा साइकल चालक र पैदलयात्रीको संख्या १० गुणाभन्दा बढी छ। साथै, सडक निर्माण तथा मर्मतसम्बन्धी कामको मात्रा पनि सान फ्रान्सिस्कोको तुलनामा १० गुणाभन्दा बढी रहेको छ।

वेभले आफ्नो प्रविधि अन्य रोबोट्याक्सी कम्पनीभन्दा फरक रहेको दाबी गरेको छ। कम्पनीका अनुसार यसको एआई प्रणालीले सवारी सञ्चालन गर्नुअघि शहरका सडकहरूको विस्तृत डिजिटल नक्सा तयार पार्नुपर्ने आवश्यकता पर्दैन।

केन्डलका अनुसार वेभको एआईलाई विभिन्न देशका लाखौँ घण्टाको ड्राइभिङ डेटा प्रयोग गरी प्रशिक्षण दिइएको छ। यसका कारण प्रणालीले अगाडिको सडक अवस्था बुझेर वास्तविक समयमा निर्णय लिन सक्ने कम्पनीको दाबी छ।

वेभले हालसम्म युरोप, एसिया र उत्तर अमेरिकाका ५०० भन्दा बढी शहरमा आफ्ना स्वचालित सवारीसाधन सञ्चालन गरिसकेको जनाएको छ।

उबरबाहेक वेभमा अमेरिकी प्रविधि कम्पनीहरू एनभिडिया र माइक्रोसफ्ट लगायतले लगानी गरेका छन्।

उबरको प्रतिस्पर्धी कम्पनी वेमो, जुन अल्फाबेटको स्वामित्वमा छ, ले पनि लन्डनमा आफ्ना स्वचालित सवारीसाधनमार्फत सडकको नक्साङ्कन गरिरहेको छ। तर वेमोले हालसम्म यात्रुका लागि आफ्नो रोबोट्याक्सी सेवा सुरु गरेको छैन।

उबरका ग्लोबल प्रमुख स्वचालित मोबिलिटी तथा डेलिभरी सरफराज मरेडियाका अनुसार निकट भविष्यमा रोबोट्याक्सीले लन्डनका परम्परागत ‘ब्ल्याक क्याब’ चालकलाई ठूलो चुनौती नदिने अपेक्षा गरिएको छ। उनका अनुसार लन्डनको यातायात बजार अझै विस्तार भइरहेकाले नयाँ र पुराना दुवै प्रकारका सेवाका लागि पर्याप्त अवसर रहनेछ।