कृष्णभीर सडकखण्ड आज एक घण्टा खुल्ने, १ गतेदेखि नियमित सञ्चालनको तयारी

काठमाण्डौ । पृथ्वी राजमार्गअन्तर्गत धादिङको कृष्णभीर सडकखण्डमा आज एक घण्टा सवारीसाधन सञ्चालन गरिने भएको छ।

सडकखण्डमा भइरहेको निर्माण तथा मर्मतसम्भारका कारण बन्द रहेको कृष्णभीर क्षेत्रमा आज २०८३ भदौ ३० गते बेलुका एक घण्टा सवारी आवागमन खुला गरिने भएको हो। त्यसैगरी, भदौ ३१ गते बिहान पनि एक घण्टा सडक सञ्चालनमा ल्याइने जानकारी दिइएको छ।

रातिको समयमा समेत सुरक्षित रूपमा सवारी आवागमन सञ्चालन गर्न कृष्णभीरको भिर क्षेत्रमा बत्ती जडान गर्ने काम भइरहेको छ। उक्त काम समयमै सम्पन्न भए भदौ ३१ गते रातिदेखि नै सडक नियमित रूपमा सञ्चालनमा ल्याउने तयारी रहेको छ।

यदि बत्ती जडानलगायतका काम समयमै सम्पन्न हुन नसकेमा भने असोज १ गतेदेखि नियमित रूपमा सवारी सञ्चालन गरिने बताइएको छ।

स्थानीय वडा अध्यक्ष कुमार बस्नेतका अनुसार सडकमा भइरहेको कामलाई तीव्रता दिइएको छ। यात्रुको सुरक्षा र सहज आवागमनलाई प्राथमिकतामा राख्दै सडक सञ्चालनको व्यवस्था मिलाउन लागिएको उनले जानकारी दिए।

कृष्णभीर सडकखण्ड पृथ्वी राजमार्गको महत्वपूर्ण तथा संवेदनशील खण्ड भएकाले यहाँको सडक अवरोधले धादिङ हुँदै राजधानी काठमाडौं तथा देशका विभिन्न जिल्लातर्फ आवतजावत गर्ने यात्रु प्रभावित हुँदै आएका छन्। सडक नियमित सञ्चालनमा आएपछि यात्रु तथा मालवाहक सवारीसाधनलाई ठूलो राहत पुग्ने अपेक्षा गरिएको छ।