त्रिपुरेश्वर बस आगलागी : मृतकको पहिचानमा अन्योल, दावा लामालाई बग्गीखानामा बोलाएर सोधपुछ

 

काठमाण्डौ । त्रिपुरेश्वरमा सोमबार बसमा आगलागी हुँदा जलेर मृत्यु भएका व्यक्तिको पहिचानलाई लिएर अन्योल देखिएको छ।

घटनापछि मृतकको साथमा फेला परेको सवारी चालक अनुमतिपत्रका आधारमा प्रहरीले उनी काभ्रेका २५ वर्षीय दावा लामा रहेको जानकारी दिएको थियो। तर दावा लामा नामका व्यक्ति आफैं सम्पर्कमा आएर आफू सकुशल रहेको बताएपछि मृतकको पहिचानबारे थप अनुसन्धान सुरु भएको हो।

यससँगै मृतकको साथमा फेला परेको लाइसेन्स दुरुपयोग भएको हुनसक्ने आशंका पनि गरिएको छ।

प्रहरीले आफूलाई दावा लामा बताउने व्यक्तिलाई काठमाडौं उपत्यका ट्राफिक प्रहरी कार्यालय रामशाहपथस्थित बग्गीखानामा बोलाएको छ। उनीसँग घटनाबारे सोधपुछ भइरहेको एक प्रहरी अधिकृतले जानकारी दिएका छन्।

रिद्धिसिद्धी यातायातको बा ५ ख ४२७४ नम्बरको बसमा सोमबार दिउँसो त्रिपुरेश्वर बस स्टप नजिक आगलागी भएको थियो। आगलागी हुनुअघि बसका चालक र ट्राफिक प्रहरीबीच विवाद भएको बताइएको छ।

त्यसको केही समयपछि बसको पछिल्लो भागबाट आगो सल्किएको देखिएको थियो। आगलागीमा परी एक व्यक्तिको जलेर मृत्यु भएको थियो।

घटनाको वास्तविक कारण र मृतकको पहिचानबारे काठमाडौं उपत्यका प्रहरी कार्यालय रानीपोखरीले अनुसन्धान गरिरहेको जनाएको छ।