एक अर्बभन्दा बढीको हुण्डी कारोबारको आरोपमा महिला पक्राउ

काठमाण्डौ । नेपाल प्रहरीले अवैध हुण्डीमार्फत एक अर्ब रुपैयाँभन्दा बढीको कारोबार गरेको आरोपमा एक महिलालाई पक्राउ गरेको छ।

प्रहरीको केन्द्रीय अनुसन्धान ब्यूरो (सिआइबी) को टोलीले सुनसरीको धरान उपमहानगरपालिका–१३ की ज्योति शाहीलाई १ अर्ब ३ करोड ८४ लाख ७५ हजार ८४५ रुपैयाँ बराबरको हुण्डी कारोबार गरेको आरोपमा पक्राउ गरेको हो।

सिआइबीका प्रवक्ता अनुपमशमशेर जबराका अनुसार श्रमिकहरूले विदेशमा आर्जन गरेको रकम अनौपचारिक माध्यमबाट नेपाल भित्र्याई विभिन्न व्यक्तिका नाममा रहेका बैंक खातामार्फत कारोबार गर्ने गरेको सूचनाका आधारमा शाहीलाई पक्राउ गरिएको हो।

प्रहरीका अनुसार शाहीले विदेशबाट प्राप्त रकमलाई स–साना भागमा विभाजन गरी कनेक्ट आईपीएसलगायत विद्युतीय तथा डिजिटल माध्यमबाट असम्बन्धित व्यक्तिका बैंक खातामा पठाउने गरेको प्रारम्भिक अनुसन्धानबाट खुलेको छ। यही माध्यमबाट उनले हुण्डी कारोबार सञ्चालन गरेको प्रहरीको दाबी छ।

शाहीले घरेलु तथा साना उद्योग कार्यालय, इटहरीमा दर्ता रहेको ८८‘शाही मनी ट्रान्सफर’८८का नाममा कृषि विकास बैंक, सेन्चुरी कमर्सियल बैंक, ग्लोबल आइएमई बैंकलगायत ५२ वटा बैंक तथा वित्तीय संस्थामार्फत उक्त रकम कारोबार गरेको पाइएको सिआइबीले जनाएको छ।

हुण्डीसम्बन्धी कसुरमा अनुसन्धानका लागि जिल्ला अदालत, सुनसरीबाट पक्राउ अनुमति लिएर शाहीलाई धरानको खैरेनीबाट पक्राउ गरिएको प्रहरीले जनाएको छ।

पक्राउ परेकी शाहीमाथि हुण्डी कारोबारसम्बन्धी कसुरमा थप अनुसन्धान भइरहेको सिआइबीले जनाएको छ।