सेयरबजार दोहोरो अंकले खस्कियो, जानकार भन्छन् -दशैंपछि बजारले एउटा राम्रो स्विङ लिन सक्छ

काठमाण्डौ । साताको पहिलो कारोबार दिन सेयरबजार दोहोरो अंकले ओरालो लागेको छ । आज नेपाल स्टक एक्सचेञ्ज (नेप्से) परिसूचक ०.६२ प्रतिशत अर्थात १६.४७ अंकले घटेर २ हजार ६१३.३३ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.२८ प्रतिशतले घटेर ४६७.६७ विन्दुमा झरेको छ ।

आज नेप्सेमा सूचीकृत ३५७ वटा स्क्रिप्टको १ करोड ३१ लाख ७८ हजार १२८ कित्ता सेयर किनबेच हुँदा कुल कारोबार रकम ५ अर्ब ३८ करोड ५७ लाख बढीको सेयर कारोबार भएको छ ।  

आजको बजारबारे नेपाल इन्भेष्टर्स फोरमका अध्यक्ष तुलसीराम ढकाल भन्छन्, ‘आज बजार घट्नुको मुख्य कारण भनेको केही दिनअघि बजार लगातार बढ्दा नाफा बुक हुनु हो । साथै यतिबेला बजारमा चाडपर्वको पनि प्रभाव देखिन थालेको छ । लगानीकर्ताहरु क्लोजिङको समय नजिकिँदै जाँदा हिसाब किताब मिलाउन र चाडपर्वको लागि खर्च जुटाउन केही प्रतिशत नाफा भएपनि सेयर बेच्न थालेका छन् । तर समग्र बजारको अवस्था हेर्दा अहिले लगानीकर्ताको मनोबल विस्तारै बढ्दै गइरहेको छ र बजार पनि म्याचुअर्ड हुँदै गएको छ । यसबाहेक र्बैंकहरुको ब्याजरपनि स्थिर छ र तरलता फालाफाल छ । बजारमा ३ अर्ब रकम छ, तर लगानीकर्ताहरु निर्धक्क लगानी गर्ने वातावरण सिर्जना खोजिरहेका छन् र यो विस्तारै बन्दै गइरहेको छ । बजार घटबढ हुनु बजारको नियम नै हो घटिहाल्दा आत्तिहाल्नुपर्ने अवस्था छैन । सम्भवतः दशैंपछि बजारले एउटा राम्रो स्विङ लिन सक्छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये एउटा बाहेक अन्य सबैमा रातो पोतियो । आज व्यापार समूह मात्रै बढ्यो । यो समूह आज ०.२३ प्रतिशतले बढ्यो ।  

यो दिन निर्जीवन बीमा समूह सर्वाधिक अर्थात १.२० प्रतिशतले घट्यो । यस्तै बैंकिङ समूह ०.१९, विकास बैंक ०.६९ प्रतिशत, फाइनान्स ०.८५, होटल ०.८७, हाईड्रो १.०३, लगानी १.१६ , जीवन बीमा ०.८३, उत्पादन तथा प्रशोधन ०.३०, लघुवित्त ०.८२, म्युचुअल फण्ड ०.७५ र अन्य समूह ०.५९ प्रतिशतले घट्यो ।  

सर्वाधिक कारोबार हुने कम्पनी

आज हिमालयन डिस्टीलरीको सर्वाधिक सेयर कारोबार भयो । यो कम्पनीको आज ३५ करोड ८२ लाख बढीको सेयर कारोबार भयो । यस्तै शिवम् सिमेन्टको २९ करोड ७८ लाख, हाथवे इन्भेष्टमेन्टको १९ करोड ९८ लाख र सिद्धार्थ बैंकको १२ करोड ३७ लाख बढीको सेयर कारोबार भयो ।  

सर्वाधिक कमाउने र गुमाउने कम्पनी

आज कारोबारमा आएका मध्ये एउटा मात्रै कम्पनीको सेयरमूल्यमा अपर सर्किट लााग्यो । आज ७ प्रतिशत लक्ष्मी डिबेञ्चरको मूल्यमा मात्रै अपर सर्किट लाग्यो । यस्तै आज १० प्रतिशत केबीएल डिबेञ्चरको मूल्य १२.१७ प्रतिशत र ६.२५ प्रतिशत प्राइम बैंक डिबेञ्चरको मूल्य ८.८३ प्रतिशतले बढ्यो । माण्डु हाईडोको मूल्य पनि ५.३८ प्रतिशतले उकालो लाग्यो ।  

यो दिन हाथवे इन्भचेष्टमेन्टको मूल्य सर्वाधिक अर्थात १०.५८ प्रतिशतले घट्यो ।