चिरख्वा हाइड्रोपावरको ३० लाख २० हजार कित्ता सेयरको लकइन खुल्दै

काठमाण्डौ । चिरख्वा हाइड्रोपावर लिमिटेडको संस्थापक, कर्मचारी तथा आयोजना प्रभावित स्थानीय बासिन्दाको स्वामित्वमा रहेको कुल ३० लाख २० हजार ७०० कित्ता सेयरको लकइन अवधि सकिने भएको छ।

कम्पनीले नेपाल स्टक एक्सचेञ्ज (नेप्से)लाई दिएको जानकारीअनुसार उक्त सेयरको लकइन अवधि २०८३ कात्तिक १४ गते समाप्त हुनेछ। 

लकइन खुल्ने सेयरमध्ये सबैभन्दा ठूलो हिस्सा संस्थापक समूहको छ। कम्पनीका अनुसार संस्थापक समूहको २५ लाख कित्ता सेयर लकइनमा रहेको छ।

त्यस्तै, कर्मचारीलाई सुरक्षित गरिएको १६ हजार कित्ता तथा आयोजना प्रभावित क्षेत्रका स्थानीय बासिन्दालाई सुरक्षित गरिएको ५ लाख ४ हजार ७०० कित्ता सेयरको समेत सोही मितिबाट लकइन अवधि समाप्त हुनेछ। 

यसरी तीनवटै समूहको गरी कुल ३० लाख २० हजार ७०० कित्ता सेयर लकइनमुक्त हुने कम्पनीले जनाएको छ। 

धितोपत्रसम्बन्धी प्रचलित व्यवस्थाअनुसार सर्वसाधारणलाई आईपीओ बाँडफाँट भएको मितिले निश्चित अवधिसम्म संस्थापक, कर्मचारी तथा आयोजना प्रभावित स्थानीयको सेयरमा लकइन रहने व्यवस्था छ। 

सोही व्यवस्थाबमोजिम चिरख्वा हाइड्रोपावरको उक्त सेयरको लकइन अवधि सकिन लागेको हो।