सुरक्षा खतरापछि बेलायतस्थित सैन्य बेसबाट अमेरिकी बमवर्षक फिर्ता

काठमाण्डौ । अमेरिकाले बेलायतको ग्लोस्टरशायरस्थित आरएएफ फेयरफोर्ड सैन्य बेसमा तैनाथ आफ्ना सबै बमवर्षक विमान अमेरिकाकै मुख्य बेसमा फिर्ता गरेको छ। अमेरिकी रक्षा विभागका एक अधिकारीले फेयरफोर्डमा रहेका सबै अमेरिकी बमवर्षकलाई स्वदेश फर्काइएको पुष्टि गरेका छन्।

बेलायतस्थित उक्त सैन्य बेसलाई लक्षित गरी सम्भावित सुरक्षा खतराको अनुसन्धान भइरहेका बेला अमेरिकाले बमवर्षक फिर्ता गरेको हो। सेप्टेम्बर २७ मा बेसनजिकै तीनवटा ‘सन्दिग्ध सवारीसाधन’ देखिएपछि बेलायती प्रहरीले घटनाको अनुसन्धान सुरु गरेको थियो।

अमेरिकाले विमान फिर्ता गर्नुको स्पष्ट कारण सार्वजनिक गरेको छैन। तर सुरक्षा खतराका कारण यो कदम चालिएको हुन सक्ने अन्तर्राष्ट्रिय सञ्चारमाध्यमहरूले जनाएका छन्।

फेयरफोर्डमा अमेरिकी वायुसेनाका बी–१ बमवर्षक विमानसहितका सैन्य विमानहरू तैनाथ हुँदै आएका छन्। पछिल्लो घटनापछि केही विमान तैनाथ भएको छोटो समयमै अमेरिकातर्फ फर्काइएका थिए।

अमेरिकी रक्षा विभागले सैन्य गतिविधिको सुरक्षा संवेदनशीलताका कारण विमान तथा सेनाको आवागमन तत्काल सार्वजनिक नगर्ने नीति रहेको जनाएको छ। यद्यपि सबै अमेरिकी बमवर्षकलाई अमेरिकास्थित उनीहरूका गृह बेसमा पुनः तैनाथ गरिएको पुष्टि गरिएको छ।

घटनाले बेलायतस्थित अमेरिकी सैन्य संरचनाको सुरक्षा र सम्भावित आतंकवादी खतराबारे थप चासो बढाएको छ।