बाढीपहिरोले गण्डकीका दुई राजमार्ग प्रभावित, केही सडक एकतर्फी सञ्चालन

काठमाडौँ । प्राकृतिक विपद्का कारण गण्डकी प्रदेशका म्याग्दी र गोरखामा सडक यातायात प्रभावित भएको छ। प्रहरीको पछिल्लो विवरणअनुसार बाढी र पहिरोका कारण दुई जिल्लाका सडक खण्डमा आवागमन अवरुद्ध भएको हो।

म्याग्दीको रघुगंगा गाउँपालिका–२ बैसरीस्थित बेनी–जोमसोम सडक खण्डमा गत असोज १० गते पहिरो खसेपछि अवरुद्ध भएको सडक हाल एकतर्फी सञ्चालनमा ल्याइएको छ।

यस्तै, गोरखाको आरुघाट गाउँपालिका–२, ३ र ९ अन्तर्गत नयाँपुल क्षेत्रमा गत असोज २५ गते आएको बाढीले सडक पूर्ण रूपमा अवरुद्ध पारेको छ। बाढीका कारण सोतीस्थित फलामे पुल तथा आरुघाटबाट धादिङ जोड्ने मुख्य सडकसमेत ठप्प भएको छ।