नेपालको एलडीसी स्तरोन्नति तयारी अवधि सन् २०२९ सम्म थप

काठमाडौं । संयुक्त राष्ट्रसंघको महासभाले नेपाललाई अतिकम विकसित मुलुक (एलडीसी)को सूचीबाट स्तरोन्नति गर्ने प्रक्रियाका लागि आवश्यक तयारी अवधि सन् २०२९ नोभेम्बर २४ सम्म थप गर्ने प्रस्ताव सर्वसम्मतिले पारित गरेको छ।

न्युयोर्कस्थित संयुक्त राष्ट्रसंघको मुख्यालयमा बसेको ८१औँ महासभाको बैठकले प्रस्ताव नम्बर ८१रएल.८ पारित गर्दै यस्तो निर्णय गरेको हो। संयुक्त राष्ट्रसंघका लागि नेपालको स्थायी नियोगले उक्त निर्णयबारे जानकारी दिएको हो।

तयारी अवधि थपिएसँगै नेपालले स्तरोन्नतिअघि आवश्यक संरचनात्मक तथा संस्थागत सुधार गर्न थप समय पाएको छ। यस अवधिमा उत्पादन क्षमता वृद्धि, संस्थागत सुदृढीकरण तथा आर्थिक–सामाजिक रूपान्तरणलाई प्राथमिकता दिइने नेपालले जनाएको छ।

त्यस्तै, स्तरोन्नतिपछिको सहज संक्रमण सुनिश्चित गर्न सहज संक्रमण रणनीति, दिगो विकासका लागि सन् २०३० को कार्यसूची र दोहा कार्ययोजनाको प्रभावकारी कार्यान्वयनमा जोड दिइनेछ।

नेपालले यस अतिरिक्त समयबाट एलडीसी सूचीबाट सहज, दिगो र अपरिवर्तनीय रूपमा स्तरोन्नति हुने लक्ष्य हासिल गर्न सहयोग पुग्ने विश्वास व्यक्त गरेको छ। साथै, निर्णयका लागि संयुक्त राष्ट्रसंघका सदस्य राष्ट्रहरूलाई सहयोग र समर्थनप्रति धन्यवाद दिएको छ।