नेपालको डिजिटल पर्यटन प्रवर्द्धनमा नयाँ प्रयोग, पहिलोपटक ‘कुकुर तिहार रिल प्रतियोगिता’

काठमाण्डौ । संस्कृति, पर्यटन तथा नागरिक उड्डयन मन्त्रालयले नेपालको मौलिक संस्कृति र पर्वलाई डिजिटल माध्यमबाट अन्तर्राष्ट्रियस्तरमा प्रवर्द्धन गर्ने अभियानलाई तीव्र बनाएको छ ।

संस्कृति, पर्यटन तथा नागरिक उड्डयनमन्त्री खड्ग राज पौडेल ‘गनेस’ले नेपालको पर्यटन प्रवर्द्धनमा डिजिटल प्रचारप्रसारलाई प्राथमिकता दिएसँगै नेपाल पर्यटन बोर्डले पहिलोपटक ‘कुकुर तिहार रिल प्रतियोगिता–२०२६’ आयोजना गर्ने भएको हो ।

प्रतियोगितामार्फत कुकुर तिहारको सांस्कृतिक महत्व, मानिस र कुकुरबीचको आत्मीय सम्बन्ध तथा नेपाली परम्परालाई डिजिटल सामग्रीमार्फत विश्वभर चिनाउने लक्ष्य राखिएको छ ।

मन्त्री पौडेलले पछिल्लो समय नेपालको पर्यटनलाई मौलिक संस्कृति, चाडपर्व र परम्परासँग जोडेर प्रवर्द्धन गर्नुपर्नेमा जोड दिँदै आएका छन् । यसअघि दशैंको अवसरमा स्थानीय तह तथा पर्यटनसम्बद्ध संघसंस्थाको सहकार्यमा देशभरका १०० स्थानमा ‘लिङ्गे पिङ’ राखिएको थियो ।

त्यसकै निरन्तरतास्वरूप कुकुर तिहारलाई अन्तर्राष्ट्रिय दर्शकमाझ पुर्‍याउन रिल प्रतियोगिता आयोजना गर्न लागिएको हो ।

प्रतियोगितामा सहभागी हुन इच्छुकले कुकुर तिहारसँग सम्बन्धित मौलिक तथा सिर्जनात्मक भिडियो रिल तयार गरी इन्स्टाग्राम वा फेसबुकमा सार्वजनिक गर्नुपर्नेछ ।

उत्कृष्ट रिल बनाउने व्यक्तिलाई १ लाख रुपैयाँ पुरस्कार प्रदान गरिनेछ ।

प्रतियोगितामा सहभागी भिडियो अंग्रेजी भाषामा हुनुपर्नेछ । भिडियोमा अंग्रेजी सबटाइटल वा अंग्रेजी भ्वाइसओभर अनिवार्य गरिएको छ ।

सहभागीले भिडियो पोस्ट गर्दा #NepalFestival र #KukurTihar ह्यासट्याग प्रयोग गर्नुपर्नेछ । इन्स्टाग्राममा @nepaltourism तथा फेसबुकमा नेपाल पर्यटन बोर्डको आधिकारिक पेजलाई ट्याग गर्नुपर्ने व्यवस्था गरिएको छ ।

सामाजिक सञ्जालमा प्रकाशित भिडियोको डाउनलोड तथा हेर्न मिल्ने अनुमति भएको गुगल ड्राइभ लिंक [email protected] मा इमेल गर्नुपर्नेछ ।

प्रतियोगितामा पठाइने भिडियो मौलिक सिर्जना हुनुपर्नेछ । प्राप्त सामग्रीलाई नेपाल पर्यटन बोर्डले पर्यटन प्रवर्द्धन, प्रचारप्रसार तथा डिजिटल सञ्चारका विभिन्न माध्यममा प्रयोग गर्न सक्नेछ ।

प्रतियोगिताका लागि भिडियो पठाउने अन्तिम मिति सन् २०२६ नोभेम्बर २१ तोकिएको छ ।

नेपाली संस्कृतिमा कुकुरलाई निष्ठा, सुरक्षा र आत्मीयताको प्रतीकका रूपमा सम्मान गर्दै तिहारमा पूजा गर्ने परम्परा छ । यही मौलिक परम्परालाई आधुनिक डिजिटल माध्यमसँग जोडेर अन्तर्राष्ट्रिय दर्शकमाझ पुर्‍याउने प्रयासलाई पर्यटन प्रवर्द्धनको नयाँ प्रयोगका रूपमा हेरिएको छ ।

डिजिटल सामग्री उत्पादनमा सक्रिय युवा तथा अन्तर्राष्ट्रिय दर्शकलाई लक्षित यो अभियानले नेपालको सांस्कृतिक पर्यटन प्रवर्द्धनमा नयाँ आयाम थप्ने अपेक्षा गरिएको छ ।