काठमाण्डौ । रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनर्स्थापनाका लागि आर्थिक सहयोग जुट्ने क्रम जारी रहेको छ। प्रधानमन्त्री तथा मन्त्रिपरिषद्को कार्यालयका अनुसार सरकारद्वारा सञ्चालित राहत तथा उद्धार कोषका विभिन्न खातामा मौज्दात रकम १८ अर्ब ४७ करोड रुपैयाँ नाघेको छ।
कार्यालयले सार्वजनिक गरेको पछिल्लो विवरणअनुसार बुधबार बिहान ९ बजेसम्म प्रधानमन्त्री दैवी प्रकोप उद्धार कोष र प्रधानमन्त्री राहत कोषका विभिन्न खातामा कुल १८ अर्ब ४७ करोड ८ लाख ७२ हजार ३९५ रुपैयाँ मौज्दात रहेको छ।
विवरणअनुसार प्रधानमन्त्री दैवी प्रकोप उद्धार कोषका विभिन्न नौवटा वाणिज्य बैंकमा मात्रै १३ अर्ब ७३ करोड ६ लाख ७७ हजार ४३० रुपैयाँ मौज्दात रहेको छ।
यसैगरी हिमालयन बैंक र लक्ष्मी सनराइज बैंकमा रहेका अमेरिकी डलर खातामा कुल ३ करोड १७ लाख ५७ हजार ९७२ अमेरिकी डलर रहेको प्रधानमन्त्री कार्यालयले जनाएको छ।
रसुवा–भोटेकोशी क्षेत्रमा आएको बाढीले ठूलो जनधन तथा भौतिक पूर्वाधारमा क्षति पुर्याएपछि प्रभावित नागरिकको उद्धार, राहत, पुनर्स्थापना तथा पुनर्निर्माणका लागि आर्थिक स्रोत जुटाउने प्रयास हुँदै आएको छ।
सरकारले सञ्चालन गरेका राहत कोषमा स्वदेश तथा विदेशबाट आर्थिक सहयोग प्राप्त भइरहेको जनाइएको छ।
राहत कोषमा ठूलो रकम मौज्दात देखिए पनि बाढी प्रभावित क्षेत्रमा राहत वितरण, क्षतिग्रस्त पूर्वाधार पुनर्निर्माण तथा प्रभावित परिवारको पुनर्स्थापनाका लागि उक्त रकमको प्रभावकारी परिचालन महत्त्वपूर्ण हुने देखिएको छ।
विशेषगरी घरबार गुमाएका परिवारको पुनर्वास, क्षतिग्रस्त सडक तथा पुलको पुनर्निर्माण र प्रभावित समुदायको जीविकोपार्जन पुनःस्थापनामा राहत कोषको उपयोगलाई प्राथमिकता दिनुपर्ने आवश्यकता छ।
यद्यपि सार्वजनिक विवरणमा उल्लेख भएको १८ अर्ब ४७ करोड रुपैयाँ कोषहरूमा रहेको कुल मौज्दात हो। उक्त रकम सबै पछिल्लो बाढीपछि मात्रै संकलन भएको वा सम्पूर्ण रकम भोटेकोशी बाढी प्रभावितका लागि मात्रै छुट्याइएको भन्ने स्पष्ट गरिएको छैन।


प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।