निजी क्षेत्रको मनोबल उच्च बनाउँदै देश विकासमासँगै अघि बढ्छौंः अर्थमन्त्री पुन

ECONOMY& POLITICS
बिहीबार, जेष्ठ १७,२०८१ 08:59:36

काठमाण्डौ । अर्थमन्त्री वर्षमान पुनले निजी क्षेत्रलाई साथमा लिएर देशको विकासमा अघि बढ्ने बताएका छन् । बुधबार आगामी आर्थिक वर्षको बजेट सम्बन्धमा आयोजना गरिएको पत्रकार सम्मेलनमा बोल्दै अर्थमन्त्री पुनले यस्तो बताएका हुन् ।

‘हामी निजी क्षेत्रलाई संँगै लिएर विकासको यात्रामा अघि बढ्ने तयारीमा छौं, विश्वका अन्य देशको अनुभवले पनि यस्तै देखाउँछ,’ उनले भने,‘निजी क्षेत्रको मनोबल उच्च गर्ने,प्राथमिकता दिने, विश्वासमा लिने र साथमा लिएर हिड्ने प्रयास गरेका छौं, सबै क्षेत्रलाई निजी क्षेत्रमैत्री बनाउने प्रयास गरेका छौं, हाम्रा सीमा र अवस्थितीहरुले अनुमति दिएसम्म निजी क्षेत्रलाई साथै लिएर जाने हाम्रो योजना छ ।’

ठूला पूर्वाधार जस्तै विमानस्थल,सडक,पुल र नयाँ खालका निर्माणहरुमा सरकारल एक्लैले खर्च गर्न नसक्ने भएकाले यी क्षेत्रमा निजी क्षेत्रसँग हातेमालो गर्दै अघि बढ्ने अर्थमन्त्री पुनले बताए । ‘ठूला पूर्वाधार निर्माण सम्पन्न गर्न अरबौ रकम चाहिन्छ । जसलाई राज्यले एक्लै पुरा गर्न सक्दैन । तीव्र गतिको विकास निर्माणका लागि निजी क्षेत्रलाई अघि ल्याउनुपर्छ भनेर बजेटमा यस्ता विषय पनि समेटेका छौं ।’ उनले भने ।