नेप्सेमा दोहोरो अंकको सुधार, ‘बजारलाई कारोबार र भोल्युमको सपोर्ट’

STOCK MARKET
आईतवार, जेष्ठ २०,२०८१ 15:24:33

काठमाण्डौ । साताको पहिलो कारोबार दिन आज नेपाल स्टक एक्सचेञ्च(नेप्से) मा दोहोरो अंकको वृद्धि भएको छ । आज नेप्से परिसूचक ०.६५ प्रतिशत अर्थात १३.५१ अंकले घटेर २०८३.०४ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३९ प्रतिशतले बढेर ३७१.६५ विन्दुमा पुगेको छ । यो दिन नेप्सेमा सूचीकृत मध्ये ३२५ वटा कम्पनीको ९६ लाख ९७ हजार २०६ कित्ता सेयर ४ अर्ब ३१ करोड १० लाख रुपैयाँभन्दा बढीको कारोबार भएको छ ।

आजको बजारबारे बजार जानकार महेश रिजाल भन्छन्, ‘भोल्युमसहितको आजको वृद्धिलाई सकारात्मक रुपमा लिन सकिन्छ । आगामी कारोबारमा पनि आजको जस्तै भोल्युमसहित परिसूचक पनि बढेमा बजार पुनः२२ सय सम्म पुग्न सक्ने देखिन्छ ।’

रिजालको विचारमा असार मसान्तको प्रभाव भने अहिले नै नपर्ने देखिन्छ ।

अर्का बजार जानकार उपेन्द्र पाठक भन्छन्,‘बजेट पछि केहि दिन बजार घट्यो । लगानीकर्ताले बजेटमार्फत सेयर बजारका लागि केहि व्यवस्था हुने अपेक्षा गरे अनुरुप बजेट नआएपछि बजार घटेको थियो । त्यसपछि लगानीकर्ताले उधारोमा खरिद गरेको सेयरमा बिक्री गर्दा बजारमा बिक्री दबाव आएको थियो ।’

आजबाट भने लगानीकर्ता फेरी बजार प्रवेश गरेकाले बजारमा सुधार आएको उनले बताए । ‘असार महिनामा म्युचुअल फण्डहरुले पनि न्याभ सकारात्मक राख्नुपर्ने भएकाले असार महिनाको दबाव खासै नपर्ने देखिन्छ ।’ उनले भने ।

असार महिनामा ब्याज खर्चका लागि साढे २ अर्ब जति पैसा जाने देखिएको उनले दाबी गरे । यद्यपी ४ अर्बमाथिको भोल्युम आएको खण्डमा ब्याजको दबाव नपर्ने पाठकको तर्क छ ।

यो दिन नेप्सेमा सूचीकृत १३ वटा समूहमध्ये ३ वटा बाहेक अन्य सबै समूहमा हरियाली छाएको छ । आज व्यापार समूहमा उछाल आएको छ । यो समूह आज ६.५६ प्रतिशतले बढ्यो ।

त्यस्तै बैंकिङ समूह १.११, विकास बैंक ०.२२, वित्त २.१७,होटल ०.४६,हाईड्रो १.२६,जीवन बीमा ०.७७,लघुवित्त ०.५२,निर्जीवन बीमा ०.६७ र अन्य समूह ०.९६ प्रतिशतले बढ्यो ।

आज लगानी समूह ०.२३ प्रतिशत, उत्पादन तथा प्रशोधन २.४० र म्युचुअल फण्ड समूह ०.०५ प्रतिशतले घट्यो ।

धेरै कारोबार गर्ने कम्पनीहरु

यो दिन नेपाल फाइनान्स कम्पनीको सर्वाधिक सेयर कारोबार भएको छ । नेपाल फाइनान्सको आज २२ करोड ६४ लाख बढीको सेयर कारोबार भएको छ । आज पोखरा फाइनान्सको १८ करोड ७० लाख,फर्स्ट माईक्रोफाइनान्सको १४ करोड ७ लाख,अपर लोहोरे खोलाको १२ करोड ४४ लाख र एनआरएन इन्फ्रास्ट्रक्चरको १० करोड ७ लाख बढीको सेयर कारोबार भयो ।

धरै कमाउने र गुमाउने कम्पनीहरु

आज मल्टीपर्पस फाइनान्स र मकर जितुमाया सुरी हाईड्रोको सेयरमूल्य १० प्रतिशतले बढ्दै सकारात्मक सर्किट लागेको छ ।

त्यस्तै कालिञ्चोक दर्शन लिमिटेडको सेयरमूल्य ८.८५ प्रतिशत,अपर सोलु हाईड्रोको ८.४८ र माई खोला हाईड्रोको सेयरमूल्य ८.०२ प्रतिशतले बढ्यो ।

आज नारायणी डेभलपमेन्ट बैंकको सेयरमूल्य सर्वाधिक अर्थात ९.१३ प्रतिशतले घट्यो । यो दिन युनिलिभर कम्पनीको सेयरमूल्य ७.८८ प्रतिशतर पोखरा फाइनान्सको सेयरमूल्य ५.२५ प्रतिशतले घट्यो ।