नेप्सेमा सामान्य गिरावट,‘लगानीकर्ता अलमलमा पर्दा बढ्न सकेन बजार’

STOCK MARKET
बुधबार, जेष्ठ २३,२०८१ 15:26:45

काठमाण्डौ । साताको चौथो कारोबार दिन आज नेपाल स्टक एक्सचेञ्च(नेप्से) मा सामान्य अंकको गिरावट आएको छ । आज नेप्से परिसूचक ०.२६ प्रतिशत अर्थात ५.५८ अंकले घटेर २०७९.७१ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.११ प्रतिशतले घटेर ३७१.६१ विन्दुमा पुगेको छ । यो दिन नेप्सेमा सूचीकृत मध्ये ३०६ वटा कम्पनीको ८० लाख ४२ हजार ७६७ कित्ता सेयर ३ अर्ब ९९ करोड २९ लाख रुपैयाँभन्दा बढीको कारोबार भएको छ ।

आजको बजारबारे नेपाल इन्भेष्टर्स फोरमका उपाध्यक्ष राजन लम्साल भन्छन्,‘लगानीकर्ताको मनोबल बढ्न नसक्दा बजार बढ्न सकेको छैन । सरकार र नियामक निकायले पूँजी बजारलाई प्राथमिकतामा नराख्दा बजारमा दबाव परेको छ । लगानीकर्ताले अहिलेको करलाई बजेटमार्फत नै अन्तिम कर हुने अपेक्षा गरेका थिए । तर त्यसो हुन सकेन र मौद्रिक नीति पनि आउन केहि समय लाग्ने भएका कारण लगानीकर्ताले ढुक्क भएर लगानी गर्न सकेका छैनन् । ’

यद्यपी ४ अर्ब कारोबार हुनुले सेयर कर्नरिङ पनि भईरहेको हुन सक्ने आँकलन उनले गरे ।

अर्का बजार जानकार सुवासचन्द्र ढुंगाना भन्छन्,‘लगानीकर्ताहरु दोधारमा हुँदा बजारले गति लिन सकेको छैन । ब्रोकरको पैसाबाट उधारो कारोबारमा बजार चलेपछि बजारले गति लिन सकेको छैन ।

लगानीकर्ताहरु अहिले कम्पनीहरुको चौथो त्रैमासिक रिपोर्ट र मौद्रिक नीतिको प्रतिक्षामा रहेकाले यसपछि मात्रै लगानी सम्बन्धी रणनीति बनाउने तरखरमा लागेको र बजार २१ सयभन्दा माथि गएमा बजारले गति लिने ढुंगाना बताउँछन् ।

यो दिन नेप्सेमा सूचीकृत १३ वटा समूहमध्ये ४ वटामा हरियाली छायो भने ८ वटामा रातो पोतियो र एउटा समूह अपरिवर्तित रह्यो । आज म्युचुअल फण्ड समूहमा सबैभन्दा धेरै वृद्धि देखियो । यो समूह आज ४.९२ प्रतिशतले बढ्यो ।

त्यस्तै आज वित्त समूह ०.०९ प्रतिशत,उत्पादन तथा प्रशोधन ०.४२ र लघुवित्त समूह १.३१ प्रतिशतले बढ्यो । आज लगानी समूहमा कुनै पनि परिवर्तन भएन ।