.gif)
.gif)
.jpg)
.png)
काठमाण्डौ । साताको अन्तिम कारोबार दिन आज नेपाल स्टक एक्सचेञ्च(नेप्से) मा दोहोरो अंकको वृद्धि भएको छ । आज नेप्से परिसूचक १.३४ प्रतिशत अर्थात २९.२१ अंकले बढेर २ हजार २०४.६१ विन्दुमा पुगेको छ ।
यो उचाई विगत १ वर्षकै उच्च हो । यसअघि बजार गत साउन ७ गते २२ सय २५ विन्दुमा बन्द भएको थियो । गत माघ ४ गते इन्ट्रा डे कारोबारमा भने बजार २२ सय पुगेको थियो । तर यो वृद्धि टिक्न भने सकेको थिएन ।
यो दिन बलिया र राम्रा कम्पनीको मापक सेन्सेटिभ इन्डेक्स पनि १.५३ प्रतिशतले बढेर ३९१.६६ विन्दुमा पुगेको छ । यो दिन नेप्सेमा सूचीकृत मध्ये ३३१ वटा स्क्रिप्टको २ करोड २ लाख ३७ हजार ७८० कित्ता सेयर ७ अर्ब ८ करोड ६ लाख रुपैयाँभन्दा बढीको कारोबार भएको छ ।
आजको कारोबार ६ महिना पछि कै उच्च हो । यसअघि गत माघ २ गते ७ अर्ब बढीको कारोबार भएको थियो ।
आजको बजारबारे बजार जानकार उपेन्द्र पाठक भन्छन्, ‘पछिल्लो समय बजारमैत्री स्थायी सरकार बन्ने अपेक्षाका साथ लगानीकर्ताले लगानी बढाएका छन् । यो सँगै लगानीयोग्य रकम प्रयाप्त भएको अवस्थामा नीतिगत रुपमा पनि बजारलाई सहज हुने लगानीकर्ताको अपेक्षा छ । बजारमा विस्तारै लगानीको वातावरण पनि बन्दै गएको छ ।’
आज कारोबार र सूचक दुवै बढ्नुले बजारमा दिगोपन देखिएको र हाई क्याप कम्पनीहरु पनि चलेका कारण बजारमा राम्रो सुधार आएको पाठकले भने । यस्तै मार्जिन कर्जा सहज हुनु र सीडी रेसियो ८० भन्दा तल आउनुले अब बजारमा दैनिक १५/२० अर्बको कारोबार हुने आधार बनेको पाठक बताउँछन् ।
अर्का बजार जानकार नीमानन्द कंडेलको विचारमा पनि नयाँ समीकरणको स्थाई सरकार बन्ने निश्चित जस्तै बनेपछि बजारमा सुधार आएको छ । ‘आज बैंकिङ र बीमा समूहले बजार धानेका छन् । अर्थमन्त्रालयमा विष्णु पौडेलको सम्भावना बढी रहेको छ । यद्यपी एमालेबाट जो सुकै अर्थमन्त्री बनेतापनि बजारले अब गति लिन्छ,’ उनले भने ।
यो दिन नेप्सेमा सूचीकृत १३ वटा समूहमध्ये २ वटा समूह बाहेक अन्य सबै समूहमा हरियाली छायो । आज जीवन बीमा समूहमा सबैभन्दा धेरै वृद्धि देखियो । यो समूह आज ३.०६ प्रतिशतले बढ्यो । बैंकिङ समूह आज २.४२ प्रतिशत,विकास बैंक ०.१७, वित्त ०.३०,होटल ०.६०, हाईड्रो १.४३, लगानी ०.५१, उत्पादन तथा प्रशोधन ०.०७, म्युचुअल फण्ड १.९०, निर्जीवन बीमा १.०१ र अन्य समूह १.५३ प्रतिशतले बढ्यो ।
आज लघुवित्त समूह र व्यापार समूह मात्रै घटे । यी समूहहरु क्रमशः०.५३ र ०.३९ प्रतिशतले घटे ।
धेरै कारोबार गर्ने कम्पनीहरु
यो दिन सिईडिबि हाईड्रोको सर्वाधिक सेयर कारोबार भयो । आज यो कम्पनीको १५ करोड २५ लाख बढीको सेयर कारोबार भयो । साथै आज हिमालयन रि इन्स्योरेन्सको १२ करोड ७९ लाख,सानिमा जीआईसीको १२ करोड ६८ लाख र एनआरएन इन्फ्रास्ट्रक्चरको ११ करोड ७९ लाख बढीको सेयर कारोबार भयो ।
धरै कमाउने र गुमाउने कम्पनीहरु
आज नेप्सेमा कारोबार भएका ३ वटा कम्पनीको सेयरमूल्यमा मात्रै सकारात्मक सर्किट लाग्यो । आज बेलेफि हाईड्रो(९.९९ प्रतिशत),सिटिजन सुपर ३० म्युचुअल फण्ड(९.९७ प्रतिशत) र एनआइएबीएल स्टेबल फण्ड(९.८३ प्रतिशत)को सेयरमूल्यमा सकारात्मक सर्किट लाग्यो ।
यस्तै आज जानकी फाइनान्सको सेयरमूल्य ८.७६ प्रतिशत र प्रभु महालक्ष्मी लाइफको सेयरमूल्य ७.०९ प्रतिशतले बढ्यो ।
आज समाज लघुवित्तको सेयरमूल्य सर्वाधिक अर्थात ४.५९ प्रतिशतले घट्यो ।
.png)
.jpg)
.png)
.gif)
.gif)
.gif)