बजार घट्दा कारोबार बढ्यो, जानकार भन्छन्,‘ नयाँ लगानीकर्ताको प्रवेशले बजार मजबुत नै’

STOCK MARKET
सोमबार, श्रावण १४,२०८१ 15:24:38

काठमाण्डौ । साताको दोस्रो कारोबार दिन आज पनि नेपाल स्टक एक्सचेञ्च (नेप्से) मा दोहोरो अंकको करेक्सन आएको छ । आज नेप्से परिसूचक ०.७६ प्रतिशत अर्थात २०.४६ अंकले घटेर २ हजार ६६१.०९ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.९६ प्रतिशतले घटेर ४८२.१५ विन्दुमा झरेको छ । यो दिन नेप्सेमा सूचीकृत मध्ये ३२५ वटा स्क्रिप्टको ४ करोड ७७ लाख ९० हजार ८३७ कित्ता सेयर १९ अर्ब ६० करोड ९१ लाख रुपैयाँभन्दा बढीको कारोबार भएको छ ।

आजको बजारबारे बजार जानकार अजयसिंह थापा(जयशम्भु) भन्छन्, ‘धेरै दिन बढेको बजारमा आज नाफा बुक भएको छ । आज कारोबार पनि १९ अर्ब बढी भएको छ । यसले बजारमा नयाँ लगानीकर्ताको प्रवेश भएको पुष्टि गरेको छ । मौद्रिक नीतिले बैंकहरुलाई सहज हुने नीति अवलम्बन गरेकाले बैंकिङ समूहले पनि गति लिएको छ । अब आउने बैंकहरुको रिपोर्टले यो क्षेत्रको आगामी यात्रा निर्धारण गर्नेछ ।’

प्राविधिक रुपमा अहिले थर्ड वेभ चलिरहेको र आजको करेक्सन त्यसैभित्रको सानो करेक्सन भएको उनले बताए । यद्यपी बजारमा भोलि पनि करेक्सन आएको खण्डमा थर्ड वेभ सकिएको मान्न सकिने थापाले दाबी गरे ।

अर्का बजार जानकार महेश रिजालले पनि नाफा बुकका कारण नै बजारमा गिरावट आएको बताए । ‘अब बजार अधिक करेक्सन भएमा २५ सय विन्दुभन्दा तल जादैन । बजारमा नयाँ लगानीकर्ताको प्रवेशसँगै कारोबार बढ्दै गएकाले बजारलाई सपोर्ट प्राप्त भईरहेको छ । यसरी करेक्सन हुँदै गएको बजार मजबुत हुने गर्छ,’ उनले भने ।

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबै समूहमा रातो पोतिएको छ । आज वित्त समूह १.८८ प्रतिशत र हाईड्रो समूह ०.८१ प्रतिशतले बढ्यो ।

आज व्यापार समूहमा सर्वाधिक गिरावट आयो । यो समूह आज ४.५४ प्रतिशतले घट्यो । यस्तै बैंकिङ समूह ०.०३ प्रतिशत, विकास बैंक २.६९ प्रतिशत,होटल ०.२९,लगानी ०.५९,जीवन बीमा १.९७, उत्पादन तथा प्रशोधन १.७३, लघुवित्त ३.७१,म्युचुअल फण्ड ०.६६, निर्जीवन बीमा १.०६ र अन्य समूह ०.०२ प्रतिशतले घट्यो ।

धेरै कारोबार गर्ने कम्पनीहरु

यो दिन शिवम् सिमेन्टको सर्वाधिक सेयर कारोबार भयो । आज यो कम्पनीको ६१ करोड १२ लाख बढीको सेयर कारोबार भएको छ । कुमारी बैंकको आज ५५ करोड २२ लाख,नेपाल इन्भेष्टमेन्ट मेगा बैंकको ३९ करोड १८ लाख,प्रभु बैंक ३८ करोड १४ लाख र नेपाल फाइनान्स कम्पनीको ३६ करोड ९१ लाख बढीको सेयर कारोबार भयो ।

धरै कमाउने र गुमाउने कम्पनीहरु

आज नेप्सेमा कारोबार भएका १ वटा कम्पनीको सेयरमूल्यमा सकारात्मक सर्किट लाग्यो । आज नेपाल फाइनान्स कम्पनीको सेयरमूल्यमा मात्रै सकारात्मक सर्किट लाग्यो ।

मन्दाकिनी हाईड्रोपावरको सेयरमूल्य आज ८.५८ प्रतिशत,बाराही हाईड्रोको ८.१६,जानकी फाइनान्सको ६.८० र गणपति लघुवित्तको सेयरमूल्य ६.५६ प्रतिशतले बढ्यो ।

आज आरम्भ चौतारी लघुवित्तको सेयरमूल्य सर्वाधिक अर्थात ८.३५ प्रतिशतले घट्यो । यस्तै बोटलर्स नेपाल(बालाजु)को सेयरमूल्य ७.९९ प्रतिशत र अभियान लघुवित्तको सेयरमूल्य ६.८६ प्रतिशतले घट्यो ।