एचआईडीसीएलको बाँडफाँडमा नपरेकाको रकम फिर्ता आजदेखि

काठमाण्डौ । हाईड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआईडीसीएल)को लिलामीमा नपरेकाको रकम फिर्ता सुरु गरिएको छ । गत साउन २९ गतेदेखि भदौ ६ गतेसम्म लिलामीमातर्फ बिक्री आवेदन खुलाइएको १ करोड कित्ता बढी संस्थापक सेयरको बाँडफाँडमा नपरेका बोलपत्रवालाहरुलाई रकम फिर्ता गरिएको हो ।  

बिक्री प्रबन्धक ग्लोबल आइएमई क्यापिटलका अनुसार भदौ १७ गतेदेखि बोलपत्रवालाहरुले बोलपत्र फारममा उल्लेख गरेको बैंक खातामा रकम जम्मा गरिएको हो ।  

कम्पनीले लिलामीमा राखेको १ करोड ६८ लाख ५९ हजार ५० कित्ता सेयरको बोलपत्र गत भदौ १२ गते बिक्री प्रबन्धक ग्लोबल आइएमई क्यापिटल लिमिटेडको नक्सालमा रहेको कार्यालयमा बाँडफाँड गरिएको थियो । उक्त सेयरको कटअफ मूल्य १३५ रुपैयाँ निर्धारण भएको बिक्री प्रबन्धकले जनाएको छ ।  

कम्पनीको साउन २१ गते बसेको सञ्चालक समितिको बैठकको निर्णय बमोजिम संस्थापक सेयरधनी समूह‘क’उप समूह क–२ को अन्य संस्थापक अन्तर्गत लिलाम बढाबढ प्रक्रियामार्फ बिक्री नभई बाँकी रहेको १ करोड ६८ लाख ५९ हजार ५० कित्ता सेयर गत साउन २९ गतेदेखि भदौ ६ गतेसम्म लिलामीमातर्फ बिक्री आवेदन खुलाइएको थियो ।