बोइङका ३३ हजार कर्मचारी आन्दोलनमा, १० हजार विमान आपूर्तिमा समस्या उत्पन्न हुन सक्ने

काठमाण्डौ । अमेरिकी विमान निर्माता कम्पनी बोइङका ३३ हजार युनियन सदस्य आन्दोलनमा उत्रिएका छन् । कम्पनीले ४ वर्षका लागि प्रस्ताव गरेको सम्झौता रद्द गरेसँगै युनियनमा आवद्ध ३३ हजार कर्मचारी शुक्रबार काममा गएनन् ।  

कम्पनीमा विगत १६ वर्षमा पहिलोपटक भएको आन्दोलनका कारण व्यवसायिक विमानको उत्पादन बन्द भएको छ । अमेरिकाको सबैभन्दा ठूलो विमान निर्माता र निर्यातकर्ता कम्पनीमा भएको आन्दोलनले अमेरिकी अर्थतन्त्र कमजोर बन्न सक्ने आँकलन गरिएको छ । आन्दोलनको समयावधि कति लम्बिन्छ भन्ने विषयले कम्पनीको १० हजार विमान आपूर्तिमा समस्या उत्पन्न हुने जनाइएको छ ।  

उक्त प्रस्तावमा कर्मचारीहरुलाई २५ प्रतिशत तलब वृद्धि गर्ने विषय पनि समेटिएको छ । जसलाई ९५ प्रतिशत युनियन सदस्यहरुले अस्विकार गरेका छन् । 

बोइङमा कुल १ लाख ५० हजार कर्मचारी कार्यरत छन् । कम्पनीको आँकडाअनुसार कम्पनीले अमेरिकी अर्थतन्त्रमा वार्षिक ७९ अर्ब रुपैयाँबराबरको योगदान गर्ने गर्छ । यस्तै कम्पनीले १६ लाख जनालाई प्रत्यक्ष तथा अप्रत्यक्ष रुपमा काम दिदै आईरहेको छ ।